Tanınımış ictimai xadimə irad?

Azərbaycan İslam Partiyası (AİP) Baş Məclisi bu günlərdə keçirilən son iclasında partiyanın Demokratik Qüvvələrin Milli Şurasında (DQMŞ) təmsil olunan üzvlərinin məsələsi qaldırılıb. 

AİP Baş Məclisinin üzvü Rövşən Əhmədlinin MŞ-nin namizədini dəstəkləməsi  haqda bəyanatının olmaması qeyd edilib. Həm də quruma “Qarabağın Azadlığı Uğrunda” İslami Müqavimət Hərəkatının adından iştirak etdiyi nəzərə çatdırılıb.     

Əsas mübahisə və müzakirə Baş Məclis üzvü Natiq Kərimovun MŞ-nin namizədi Cəmil Həsənlini dəstəkləməsinin üzərində cəmlənib. N.Kərimovun uzun illərdən bəri partiyada xidməti olduğu vurğulanaraq hər hansı qərar qəbul edilməyib. Həm də  N.Kərimovun MŞ-də Nardaran Ağsaqqallar Şurası adından təmsil olunduğu qeyd olunub. Amma AİP sədr Akif Heydərli bu müzakirənin özünü N.Kərimov üçün xəbərdarlıq adlandırıb.  

N.Kərimov Turan-ın müxbiri ilə söhbətində qeyd edib ki, MŞ-də Nardaran Ağsaqqallar Şurasının təmsilçisi kimi iştirak edib. Ünvanına iradları əsassız sayan N.Kərimov partiya mənafeyi naminə bu məsələdə dərinə getmək fikrində olmadığını söyləyib. 

AİP Baş Məclisi 9 oktyabr prezident seçkilərində Ədalət Partiyasının namizədi İlyas İsmayılovu dəstəkləmək qərarı verib. Bəzi islamçılar isə MŞ-nin namizədini  dəstəkləməyə üstünlük veriblər. Bu məsələ partiyada mübahisə obyektinə dönüb. 

N.Kərimov Azərbaycan ictimai həyatında fəal olan şəxslərdən biridir, Nardaran Ağsaqqallar Şurasının sədridir. Ölkədə nüfuza malik ictimai-siyiasi dəyərə malik şəxslərdən sayılır. -05D/B-