Tbilisidə iğtişaşlar

Bakı/14.05.18/Turan: Mayın 12-nə keçən gecə Tbilisidəki iki gecə klubunda keçirilən polis reydi şəhərin mərkəzində çoxminlik nümayişlə nəticələnib. Aksiya iştirakçıları hakimiyyətin repressiv siyasətinə etiraz ediblər.

"Amerikanın səsi" bildirib ki, aksiyanın təşkilatçıları 20-yə yaxın hüquq-müdafiə təşkilatı, həmçinin Tbilisidəki bir neçə gecə klubunun administrasiyasıdır. Batumi, Zuqdidi və Kutaisidə də analoji aksiyalar keçirilib. Rəsmi versiyaya görə, polis narkodilerlərə qarşı əməliyyat keçirib.

Son həftələr Tbilisidə gənclərin narkotik maddə qəbulundan ölməsi faktları artıb. Polis Tbilisidə narkotik maddəni yayanların aşkar edilməsi üçün 3 ay "Bassiani" və "Qalleri" gecə klublarında əməliyyat-axtarış tədbirləri keçirib. Mayın 12-də polis narkotik maddə yayan 8 şəxsi saxlayıb.

Eyni zamanda polis klublarda olan vətəndaşlara qarşı güc tətbiq edib ki, bu da ictimaiyyətin etirazına səbəb olub

Etiraz iştirakçıları bildirirlər ki, yüksək vəzifəli məmurların himayədarlığı olmasa Gürcüstana narkotik maddənin gətirilməsi mümkün deyil.

Gecə klublarında polis reydləri "şou"dur və formal xarakter daşıyır.-02D-