TeliaSonera Eurasia ittihamları rədd edir

TeliaSonera telekommunikasiya şirkəti yanvarın 5-də contact.az  saytında İsveç İctimai Televiziyası və Mütəşəkkil Cinayətkarlıq və Korrupsiya ilə Mübarizə üzrə Hesabatlılıq Layiəsinə (OCCRP) istinadən gedən «Sərhədsiz mobilekratiya» adlı yazını yanlış qənaətə əsaslanan və həqiqətə uyğun olmayan hesab edir.

TeliaSonera Eurasia şirkətinin korporativ ünsiyyət üzrə vitse-prezidenti Erim Taylanlar contact.az-a məktubunda korrupsiya və Azercell Telekom abunəçilərinin şəxsi informasiyalarının kiməsə verilməsi ittihamları ilə bağlı şirkətin rəsmi mövqeyini açıqlayır. Məktubda deyilir:

“İlk olaraq bildirmək istərdik ki, “Yerli bazarda irəliləmək üçün holdinq funksionerlərinin Özbəkistan məmurlarına rüşvət verməsi ilə bağlı ciddi şübhələr var” və “TeliaSonera şirkətinin iki yüksək vəzifəli rəhbəri Mərkəz Asiya ölkələrində 3G şəbəkələri lisenziyası almaq üçün offşor şirkəti yaradıblar“ bəyanatları həqiqəti əks etdirmir.

Belə ki, TeliaSonera-ya qarşı İsveçdə yalnız bir ittiham irəli sürülmüşdür ki, o da Özbəkistanda olan müəssəmizlə əlaqədardır və hal-hazırda həmin ittiham və Özbəkistandakı sərmayalərimiz üzrə iki müstəqil araşdırma aparılmaqdadır. İstintaq İsveçdə dövlət ittihamçısı - prokuror Qunnar Ştetler tərəfindən başlanılmışdır. Eyni zamanda, TeliaSonera-nın təşəbbüsü ilə Byorn Rayzenin rəhbərliyi altında “Mannheimer Swartling” hüquq şirkəti müstəqil araşdırma aparır.

Hər iki istintaq işi davam edir və TeliaSonera-nın Özbəkistan prezidentinin ailə üzvlərinə rüşvət verməsi və bizim yerli tərəfdaşımız olan Takilantın prezidentin ailəsi ilə əlaqəli olması haqqında fərziyyələr təsdiqini tapmamışdır. Qeyd etmək lazımdır ki, 12 dekabr 2012-ci il tarixində Stokholm Rayon məhkəməsi prokuror Gunnar Ştetlerin rüşvət hesab etdiyi və Takilanta məxsus hesabda olan 1.8 miyard İsveç kronu məbləğinin üzərində həbs qoyulması ilə əlaqədar müraciətini rədd etmişdir.

TeliaSonera üçün Özbəkistana yatırılan sərmayələr üzrə ətraflı araşdırmanın aparılması fövqəladə əhəmiyyətə malikdir. Bu araşdırma başa çatmayana gədər şirkətin rəhbərləri və əməkdaşları əsassız şübhələrlə üzləşməli olurlar. TeliaSonera-nın rəhbərliyi inanır ki, davam etməkdə olan hüquqi prosedurlar korrupsiya ittihamlarının əsassız olduğunu təsdiq edəcəkdir. Bu günə gədər ortaya çıxan məlumatların heç biri bu fikrin dəyişməsinə səbəb yaratmır. Bundan əlavə, TeliaSoneranın Azərbaycandan qeyri ölkələrdəki fəaliyyətinə dair öz təsdiqini tapmamış məlumatlarda heç bir aidiyyatı olmadan Azercell-in adının hallandırılmasının qərəzli olduğunu düşünür və bu halı düzgün hesab etmirik.

Eyni zamanda bildirmək istərdik ki, TeliaSoneranın Azərbaycandakı operatoru olan Azercell öz abunəçilərinə aid şəxsi məlumatları heç kimlə və heç nəyin müqabilində bölüşmür. Azercell Azərbaycanın ən böyük mobil operatorudur və məqsədi Azərbaycan əhalisinə mobil rabitə xidmətləri göstərmək və onların ünsiyyətinə yardım etməklə məlumatlara çıxışını təmin etməkdir. TeliaSonera işlədiyi ölkələrdə, o cümlədən Azərbaycanda yerli qanunvericiliyə uyğun olaraq və ona ciddi şəkildə riayət etməklə fəaliyyət göstərir. Biz fərqindəyik ki, qanunvericilik, inzibati və lisenziya öhdəliklərimizə əməl etmək zərurətindən irəli gələn tələblərin yerinə yetirilməsi insanların şəxsi həyat və ifadə azadlığına təsir etmək narahatlığı yarada biləcəyi kimi də fikirlərə səbəb ola bilər. Lakin, bu da bəllidir ki, bütün telekommunikasiya şirkətləri ərazisində fəaliyyət göstərdikləri ölkənin qanunvericiliyinə riayət etməlidir”.---0—