Tərtərdə mina partlayışı nəticasində kənd sakini xəsarət alıb

Баку/05.11.23/Turan: Noyabrın 5-də saat 12:00 radələrində Tərtər rayonu Təpəkənd kəndinin minalardan təmizlənməyən ərazisində mina partlayışı baş verib.

DİN-in mətbuat xidmətinin regional qrupundan  bildirilib ki, rayonun Seyidimli kənd sakini, 1960-cı il təvəllüdlü Hüseynov Asif Novruz oğlu ayağından xəsarət alıb.

Faktla bağlı araşdırma aparılır.

"Bir daha vətəndaşları minalardan təmizlənməyən ərazilərə daxil olmamağa, tələb olunan qaydalara riayət etməyə çağırırıq"-deyə, məlumatda vurğulanıb.

Noyabrın 4-də Azərbaycanın xarici işlər naziri Ceyhun Bayramov Almaniya Xarici İşlər Nazirliyinin rəhbəri Annalena Barbok ilə danışıqlardan sonra keçirilən mətbuat konfransında qeyd edib ki, 2020-ci ildə 44 günlük müharibədən sonra Qarabağda 960 kv. km. ərazi minalanıb.

«İlkin hesablamalara görə, son üç il ərzində Qarabağdakı qanunsuz rejim Ermənistanın dəstəyi ilə 480 kilometr ərazini "təmas xətti" boyunca  minalayıb, minalanmanın  dərinliyi hətta 2 kilometrə çatır. Bu isə o deməkdir ki, 960 kvadrat kilometr ərazi minalanıb. Söhbət  yüz minlərlə minaların basdırılmasından gedir", - deyə Bayramov bildirib.

O qeyd edib ki, 44 günlük müharibənin başa çatmasından sonra, yəni 2020-ci il noyabrın 10-dan bu yana Azərbaycanda minalardan 336 nəfər mina partlayışlarından zərər çəkib, onlardan 65 nəfər ölüb, 271 nəfər yaralanıb.—06B-