Tofiq Yaqubluya qarşı daha ağır ittiham irəli sürülüb

İsmayıllı hadisələri üzrə həbs edilmiş Müsavat Partiyasının sədr müavini Tofiq Yaqubluya qarşı yeni, daha ağır ittiham irəli sürülüb.

Xatırladaq ki, Yaqublu fevralın 4-də həbs edilib və 23-24 yanvar tarixlərində İsmayıllı şəhərində iğtişaşların təşkilində ittiham edilmişdi. Ona qarşı 233 (ictimai asayişin pozulmasına yönəlmiş əməllərin təşkili) və 315.2-ci (polis əməkdaşına güc tətbiq etməklə müqavimət göstərmək) maddələrlə ittiham irəli sürülmüşdü.

Lakin bu gün məlum olub ki, 233-cü maddə 220.1-ci (zorakılıq, talan, yandırma, əmlakı məhv etmə ilə müşaiyət olunan kütləvi iğtişaşlar təşkil etmək və ya belə iğtişaşlarda iştirak etmək) əvəz olunub.

Bu barədə Turan-a müttəhimin qızı Nərgiz Yaqublu vəkillərə istinadla bildirib.

Öz növbəsində, bu gün T.Yaqubluya baş çəkmiş vəkil Əkif Əlizadə Turan-a bildirib ki, o, irəli sürülmüş ittihamları təkzib edir və onları uydurma və sübutsuz hesab edir.

Xatırladaq ki, yanvarın 23-də İsmayıllıları təhqir edən Çıraq otelinin sahiblərinin davranışından qəzəblənən yerli sakinlər avtomobili və oteli yandırıblar.

Növbəti gün İsmayıllıda polis və rayon icra başçısının istefasını tələb edən yerli sakinlərlə qarşıdurma baş verib.

T.Yaqublu yanvarın 24-də “Yeni Müsavat” qəzeti tərəfindən hadisələri işıqlandırmaq üçün İsmayıllıya ezam edilib.

Qeyd edək ki, T.Yaqubluya qarşı yeni ittiham aprelin 25-də “Azadlıq” qəzetində onun İlham Əliyevi kəskin tənqid etdiyi məqalə dərc edildikdən bir gün sonra irəli sürülüb. -16C06-