T.Şaraşenidze: Rusiya Gürcüstan ərazilərinin işğalını davam etdirir

Tbilisi Abxaziya və Cənubi Osetiyanın tanınmaması üzrə diplomatik səyləri davam etdirir və bütün sivil dünya Gürcüstan ərazilərinin Rusiya tərəfindən işğal edilməsi faktını pisləyir. Gürcüstanın Bakıdakı səfiri Teymuraz Şaraşenidzenin 2008-ci il avqust müharibəsinin 4-cü ildönümünə həsr olunmuş bugünki mətbuat konfransında səslənən əsas fikir bundan ibarət olub.

Rusiya Silahlı Qüvvələri əvvəlki kimi ölkə ərazisindədir və Gürcüstan ərazisinin 20 faizini işğal edir. Rusiya bu ərazilərdə iki hərbi baza yaradıb və orada on mindən çox hərbiçi yerləşdirib, deyə diplomat bildirib.

Səfir qeyd edib ki, Gürcüstana qarşı müharibənin səbəbi Tbilisinin müstəqil xarici siyasəti, Avropa və Avroatlantik məkana tam inteqrasiya etmək cəhdi olub.

Gürcüstan, qarşılaşdığı ciddi çağırışlara baxmayaraq, xarici kursu dəyişməyib. NATO-nun sonuncu Çikaqo sammitində Gürcüstanın Alyansa qəbul edilməsinə dəstək ifadə olunub və iki illik proqram təsdiq olunub.

Bununla belə, Gürcüstan Rusiya ilə münasibətlərin normallaşdırılmasının tərəfdarıdır. O, birtərəfli qaydada RF vətəndaşları üçün viza rejimini ləğv edib, RF-nin ÜTT-ə daxil olmasına razılıq verib. Lakin Rusiya konstruktivlik nümayiş etdirmir və cavab addımları atmır.

Gürcüstan səfiri həmçinin Azərbaycanın 2008-ci ilin avqustunda ölkəyə göstərdiyi dəstəyi - ərzaq və enerji yardımını qeyd edib.

Bu yaxınlarda Azərbaycan Baş Assambleyada Gürcüstanın məcburi köçkünlərini müdafiə qətnaməsini dəstəkləyib. Gürcüstan öz növbəsində Dağlıq Qarabağda “prezident seçkilərini” tanımadığını ilk bəyan edənlərdən biri olub. -06D-