Türkiyə hərbi kəşfiyyat rəhbərinin Azərbaycana səfəri

Bu gün Azərbaycanın müdafiə naziri Zakir Həsənov Türkiyə Silahlı Qüvvələrinin Kəşfiyyat Baş İdarəsinin rəisi Yaşar Kadıoğlunun rəhbərlik etdiyi nümayəndə heyətini qəbul edib.

Müdafiə Nazirliyinin mətbuat xidməti bildirib ki, Həsənov hərbi və digər sahələrdə uğurlu əməkdaşlığı qeyd edib. Azərbaycan-Türkiyə Yüksək Səviyyəli Hərbi Dialoq İclası çərçivəsində həyata keçirilən tədbirlərin əhəmiyyəti xüsusilə vurğulanıb.

Türkiyə nümayəndə heyətinə ordu quruculuğu sahəsində islahatlar barədə məlumat verilib.

Öz növbəsində Kadıoğlu qeyd edib ki, Azərbaycan və Türkiyə arasında strateji müttəfiqlik dostluq və qardaşlıq münasibətləri üzərində qurulub. O, birgə təlimlərin qarşılıqlı təcrübə mübadiləsi baxımından mühüm əhəmiyyətə malik olduğunu vurğulayıb.

Görüşdə hərbi əməkdaşlığın inkişaf perspektivləri və regional təhlükəsizlik məsələləri də müzakirə edilib.

Yaşar Kadıoğlu Azərbaycan Silahlı Qüvvələri Baş Qərargah rəisi Kərim Vəliyevlə də görüşüb.