Məhkəmə Qubad İbadoğlunun ölkədən çıxışına qadağa qoyulmasından şikayəti təmin etməyib

Dekabrın 3-də Bakının Nərimanov Rayon Məhkəməsində iqtisadçı- alim Qubad İbadoğlunun ölkədən çıxışına qadağa qoyulması ilə bağlı şikayətə baxılıb.

Şikayət təmin edilməyib, Turan-a vəkil Zibeydə Sadıqova bildirib.

Onun sözlərinə görə, artıq üçüncü dəfədir ki, məhkəmə İbadoğlunun Azərbaycandan çıxışına qoyulan qadağanı qaldırmaqdan imtina edir.

Müdafiə tərəfi əvvəlki iki dəfəni müalicə və mürəkkəb cərrahi əməliyyatdan ötrü ölkədən çıxışın vacibliyilə əsaslandırıb. Bu dəfə müdafiə tərəfi Avropa Parlamenti rəhbərliyinin onu 14-19 dekabr tarixlərində Strasburqa akademik Saxarov mükafatının təqdimatı mərasimində iştiraka dəvətini təqdim edib. akademik Saxarov. İbadoğlu bu mükafatın üç finalçısının arasındadır. 

Avropa Parlamenti bu dəvət  barədə informasiyanı Azərbaycanın dövlət orqanlarına da göndərib. Lakin məhkəmə heç bir əsaslandırma aparmadan şikayəti təmin etməyib.

Müdafiə tərəfi İbadoğlunun hüquqlarının məhdudlaşdırılmasını qanunsuz hesab edir. Vəkil qeyd edib ki, İbadoğlunun işi üzrə istintaq dayandırılıb. Ancaq ona heç bir rəsmi sənəd təqdim edilməyib. Eyni zamanda, İbadoğlunun təkcə hərəkət yox, həm də iş azadlığının məhdudlaşdırılması davam edir. İbadoğlu müəllimlik fəaliyyəti üçün dünyanın nüfuzlu universitetlərindən dəvətlər var, lakin ölkədən çıxa bilmir. Məhkəmənin qərarından apellyasiya şikayəti veriləcək.

* İbadoğlu 2023-cü ilin iyulunda həbs edilib. Ona qarşı Cinayət Məcəlləsinin 204.3.1 (saxta pulların satışı), 167-3.1-ci (dini ekstremizmyönlü materialların saxlanması və ya yayılması) maddələrilə ittiham irəli sürülüb.

Bir sıra dövlətlər, beynəlxalq təşkilatlar, siyasətçilər, o cümlədən ABŞ Dövlət Departamenti, ABŞ senatorları və konqresmenləri İbadoğlunu azad etməyə çağırıblar. O, siyasi məhbus kimi tanınıb.

22 aprel 2024-cü ildə məhkəmə İbadoğlunun ev dustaqlığına buraxılması barədə müdafiə tərəfinin vəsatətini təmin edib.

Lakin mayın 4-də polis əməkdaşları onu uzaqdan müşahidə üçün elektron bilərzik taxıblar.

Sentyabrda Qubad İbadoğlunun işi üzrə  istintaqın dayandırıldığı bildirilib, lakin ölkədən çıxışına qadağa ləğv edilməyib.