Türkiyə İdlibdə aerodromu darmadağın edib

Bakı/02.03.20/Turan:  Martın 1-də Türkiyə Silahlı Qüvvələri Hələb əyalətinin Neyrab bölgəsində Suriya hökumət qüvvələrinin hərbi aerodromunu darmadağın edib. Hələb ətrafındakı bu hərbi obyekt Əsəd qüvvələri tərəfindən deeskalasiya zonasının yaşayış məntəqələrinə hücumların təşkili zamanı istifadə olunurdu. “Anadolu” agentliyinin məlumatına görə, şənbə günü PUA və Türkiyə SQ artilleriyası tərəfindən aerodroma zərbə endirilib

Türkiyə Silahlı Qüvvələri Hələbin şərqində Küveyras aerodromunu darmadağın etdikdən sonra Əsəd qüvvələri komandanlığı bütün aviasiya texnikasını Neyrab bölgəsində aerodroma köçürüb. Yerli mənbələrin məlumatına görə, Suriyanın şimal-qərbində aerodromların sıradan çıxması Əsəd qüvvələrinin manevr etmək imkanlarını xeyli məhdudlaşdıracaq.

Həmin gün Türkiyə HHQ Suriya hökumət qüvvələrinin iki Su-24 bombardmançısını vurub. Türkiyənin milli müdafiə naziri Hulusi Akar İdlib deeskalasiya zonasında “Bahar qalxanı” əməliyyatının keçirildiyini bildirib. O qeyd edib ki, Türkiyə Suriyada Rusiya ilə silahlı qarşıdurma məqsədi güdmür.

Martın 1-də axşam Rusiya Müdafiə Nazirliyi bildirib ki, Türkiyə HHQ-nin Suriya səmasında təhlükəsizliyinə zəmanət vermir, Əsəd hökuməti isə İblibdəki hava məkanını uçuşsuz zona elan edib.

Qeyd edək ki, bundan öncə Rusiya Suriyaya S-300 HHM sistemləri verib ki, bunlar həmin zonada aviasiya uçuşlarının qarşısını almağa qadirdir. Ancaq bu sistemləri rusiyalı hərbçilər idarə edirlər. -02D-