Türkiyə və Azərbaycan münasibətlərin perspektivlərini müzakirə edib

Azərbaycan prezidenti İlham Əliyevin Türkiyə baş naziri Ahmet Davutoğlu ilə təkbətək və geniş tərkibdə görüşü olub.

“Türkiyə Azərbaycanın müstəqilliyini tanıyan ilk ölkə olub. Daim bütün məsələlərdə bir-birimizin yanındayıq, bir-birimizi dəstəkləyirik. Bu, dəyişməz siyasətdir. İstəyirik ki, gələcək nəsillər də bu əlaqələri yüksək səviyyədə saxlasınlar”. Bu barədə prezident İlham Əliyev Türkiyə baş naziri Ahmet Davutoğlu ilə keçirdiyi birgə mətbuat konfransında deyib.

Onun firkincə, Türkiyə və Azərbaycanın siyasəti bölgədə sabitləşdirici rol oynayır.

“Türkiyə nə qədər güclü olsa, Azərbaycanın gücü bir o qədər artacaq”.

Prezident deyib ki, Azərbaycan torpaqlarının 20 faizi ermənilərin işğalı altındadır, tarixi abidələr, şəhərlər dağıdılıb. “Münaqişə beynəlxalq hüquq normaları və Azərbaycanın ərazi bütövlüyü çərçivəsində həlini tapmalıdır”, deyə o qeyd edib

Baş nazir Ahmet Davutoğlu deyib ki, hərbi müdafiə sənayesi sahəsində Türkiyənin Azərbaycanla ortaq fəaliyyəti davam edəcək. “Türkiyə Azərbaycanın müdafiə sənayesi qurmasına xüsusi önəm verir. Qafqazda sülhün bərqərar olması Azərbaycan-Türkiyə əməkdaşlığından asılıdır. Türkiyə Azərbaycana torpaqları tam azad edilənədək dəstəyini davam etdirəcək. Problemlər sərhədlərə qarşılıqlı hörmətlə həllini tapır”.

Prezident Əliyev bəyan edib ki, “TANAP Türkiyə və Azərbaycan layihəsidir. Bu layihənin icrasında heç bir problem yoxdur. TANAP layihəsi 2018-ci ildə, bəlkə də daha tez istifadəyə veriləcək. Bununla da Türkiyə və Avropa ölkələri yeni qaz mənbəyinə çıxış əldə edəcəklər. Azərbaycanın təsdiq edilmiş qaz ehtiyatları 2,6 trilyon kubmetrdir. Bizim əsas ixrac yolumuz da Türkiyə və Türkiyə üzərindən digər Avropa ölkələridir”, deyə dövlət başçısı qeyd edib.

A.Davutoğlu Azərbaycan prezidenti ilə görüşü zamanı TANAP layihəsinin 2018-ci ildə deyil, daha tez istismara verilməsi barədə razılığa gəlindiyini, nazirlərə müvafiq tapşırıqlar verildiyini diqqətə çatdırıb.

“Avropanın enerji təhlükəsizliyində Xəzərin resursları mühüm rol oynayır. Bakı-Tiflis-Qars dəmir yolu da Çindən Avropaya uzanan yolun onurğasını təşkil edir. Çinlə də bu mövzuda görüşlərimiz, müzakirələrimiz olub. Azərbaycan prezidentinin Çinə səfərində də bu məsələ müzakirə ediləcək. Biz Azərbaycanı, Bakını Asiyanın yüksələn ulduzu kimi görürük. Baş nazir kimi bəyan edirəm ki, qarşıdakı 4 ildə də Azərbaycan bayrağı haradadırsa, Türkiyə də orada olacaq”.

Türkiyə baş naziri qeyd edib ki, iki ölkə ticarət dövriyyəsinin həcmini 5 milyard dollardan 15 milyard dollara çatdırmağı qarşıya məqsəd qoyub.

Ahmet Davutoğlu görüşdə Suriyada baş verənlər və noyabrın 24-də Rusiya təyyarəsinin vurulmasından sonra yaranmış vəziyyət barədə Azərbaycan prezidentinə məlumat verdiyini bildirib.

“Dostumuz və qonşumuz olan Rusiyanın baş verənləri soyuqqanlı şəkildə dəyərləndirməsini gözləyirik”, deyə o qeyd edib.

Onun sözlərinə görə, Rusiya Türkiyənin sərhədlərini dəfələrlə pozub və dünya ictimaiyyəti bununla bağlı məlumatlandırılıb.

“Türkiyə sərhədləri bizim üçün müqəddəsdir. Digər tərəfdən, Suriya problemindən Türkiyə qədər təsir görən ölkə yoxdur. Türkiyədə 2 milyon suriyalı qaçqın var, qaçqın axınına görə indiyədək 8 milyard dollar xərclənib”.

A.Davutoğlu bəyan edib ki, Türkiyə Rusiya ilə hər bir məsələni müzakirə etməyə, eyni masa arxasında oturmağa hazırdır. Bu gün Türkiyə və Rusiya xarici işləri nazirləri Belqradda görüşəcəklər.

“Bizim üçün yeganə toxunulmaz məsələ sərhədlərimiz və suverenliyimizdir”.

Baş nazir Türkiyənin İran və Rusiyaya qarşı iqtisadi sanksiyalarda iştirak etmədiyini xatırladıb.

“Ancaq bu gün Türkiyənin heç bir şəkildə günahı olmadığı bir hadisəyə görə Rusiyanın Türkiyəyə qarşı iqtisadi embarqosuna təəccüb edirik”.

Baş nazir Rusiya tərəfinə çağırış edərək bildirib ki, Türkiyə problemin masa ətrafında oturaraq həll edilməsinin tərəfdarıdır.

“Türkiyəyə qarşı əsassız ittihamları isə qəbul etməyəcəyik. Türkiyə sərhədlərinin pozulmasına yönəlmiş heç bir addıma imkan verməyəcəyimizi də bir daha bəyan edirəm”, deyə o qeyd edib. -0-