Ukrayna müxalifəti Avromeydan fəaliyyət planını açıqlayıb

Ukrayna müxalifəti “Meydan iştirakçılarının fəaliyyət planı”nı formalaşdırıb. 5 fəsildən ibarət müvafiq sənəd “Batkivşina” və UDAR partiyaları tərəfindən dərc edilib.

Planın əsas bəndləri siyasi məhbusların azad edilməsi, Ukraynanın daxili işlər naziri Vitali Zaxarçenkoya, nümayişçilərin döyülməsində təqsirli olan “Berkut” xüsusi təyinatlı milis dəstəsinin üzvlərinə qarşı cinayət işi açılması, Nikolay Azarov hökumətinin istefası, növbədənkənar parlament və prezident seçkiləri, Avropa İttifaqı ilə assosiasiya haqqında saziş imzalanmasıdır.

RBK-nın məlumatına görə, plana əsasən, beynəlxalq təşkilatlara, xüsusən Avropa İnsan Hüquqları Şurasına, Avropa Şurasına Ukrayna hakimiyyətinin, müxalifətin fikrincə, ölkənin beynəlxalq öhdəliklərinə zidd olan əməllərindən şikayətlə müraciət etmək nəzərdə tutulur. Həmçinin, “Sərhədsiz reportyorlar” beynəlxalq qeyri-hökumət təşkilatının və beynəlxalq hüquq müdafiə təşkilatlarının nümayəndələrinin Ukraynada hadisələrin inkişafının monitorinqini həyata keçirmək üçün müşahidəçi qismində dəvət edilməsi nəzərdə tutulur.

Müxalifətçilər həmçinin dövlətin rəhbər şəxsləri tərəfindən “oğurlanmış” aktivlərin qaytarılması üzrə birgə təşəbbüslərində nəzərdə tutulmuş mexanizmlərin işə salınması və Ukraynanın yüksək vəzifəli şəxslərinin və onların yaxın qohumlarının xarici hesablarının və daşınmaz əmlakınıın mənbəyinin araşdırılmasının təşkili məqsədilə Vəsaitlərin Qanunsuz Yuyulmasına qarşı Mübarizə üzrə Beynəlxalq Təşkilata (FATF), Dünya Bankına, BMT-nin narkotiklər və cinayətkarlığa qarşı mübarizə İdarəsinə müraciət etmək niyyətindədirlər.

Həmçinin, demokratik ölkələrin deputatlarının, siyasətçilərinin Kiyevdə Müstəqillik Meydanında fasiləsiz iştirakını təşkil etmək, habelə Polşa Seymi deputatlarının, Avropa Parlamenti və Avropa ölkələrinin, ABŞ, Kanadanın milli parlamentlərinin deputatlarını, Rusiya və Belarusdan müxalifət liderlərini dəvət etmək nəzərdə tutulur.

Müxalifət “Ukraynada cəlladlar və insan hüquqlarını pozanların qara kitabı”nı formalaşdırmaq və Meydanda o kitaba daxil ediləcək ilk şəxslərin adlarını elan etmək niyyətindədir. Müxalifət bu aksiyanı “Cəlladı tanı” adlandırıb.

“İctimai itaətsizlik tədbirləri” kimi müxalifət sahibləri deputat və ya Regionlar Partiyasının fəalları olan şirkətlərin və təşkilatların mal və xidmətlərini boykot etməyə çağırmaq niyyətindədir. Həmçinin hakimiyyətin hazırki siyasəti ilə razılaşmayan dövlət qulluqçularına könüllü olaraq istefa vermək çağırışı ilə müraciət etmək planlaşdırılır. Bundan başqa, tədbirlər siyahısında hazırki rejimi dəstəkləyən dövlət və hökumət başçılarının Ukraynaya səfərinə qarşı kütləvi etiraz nümayişləri təşəbbüsləri yer alır.

Həmçinin, müxalifət Əfqanıstanda müharibə iştirakçılarını, Silahlı Qüvvələrin və güc qurumlarının veteranlarını aksiyaların keçirildiyi yerlərdə ictimai asayişin qorunmasına və dinc etirazlar zamanı vətəndaşların hüquqlarının müdafiəsinə cəlb etmək niyyətindədir. Meydan perimetrinin gücləndirilməsi üçün ağır inşaat, kənd təsərrüfatı və kommunal texnika cəlb edilməsi planlaşdırılır.

Bundan başqa, insanlarn aksiyalara gətirilməsinin daimi monitorinqini həyata keçirmək, Kiyev ətrafında bütün mühüm bölgələrdə və Kiyevin özündə, xüsusən dəmir yolu və avtobus vağzallarında bu monitorinqə görə məsul şəxsləri müəyyən etmək nəzərdə tutulur.

Kiyevin mərkəzində və Ukraynanın bir sıra digər şəhərlərində Avrointeqrasiya tərəfdarlarının Ukrayna hökumətinin Aİ ilə Assosiasiya haqqında sazişin hazırlanmasının dayandırıldığını elan etməsindən sonra başlamış kütləvi etirazları davam edir. Noyabrın 30-dan etibarən Kiyevin mərkəzində qarşıdurmalar nəticəsində ziyan çəkənlərin ümumi sayı, son məlumatlara görə, 413 nəfər təşkil edib. Onlar arasnda 220 hüquq mühafizəçisi var. -02D-