Ümid Partiyası SMDT-yə təzyiqi pisləyir

Ümid Partiyası Baş Prokurorluğun Seçkilərin Monitorinqi və Demokratiyanın Tədrisi Mərkəzinin (SMDT) fəaliyyətini araşdırmağa başlamasını vətəndaş cəmiyyətinə siyasi təzyiq kimi qiymətləndirir.

Partiyanın bəyanatında qeyd edilir ki, oktyabrın 31-də Ağır Cinayətlər üzrə İstintaq İdarəsinin nümayəndələri SMDT-nin ofisində yoxlama həyata keçiriblər. Onlar SMDT-yə və onun tərəfdaşı olan təşkilata – Könüllülərin Beynəlxalq Əməkdaşlığı İctimai Birliyinə məxsus hesabatları, iki kompüteri və maliyyə sənədlərini müsadirə ediblər.

Ümid Partiyası hesab edir ki, bu yoxlama SMDT-nin seçkilər zamanı həyata keçirdiyi layihələrlə bağlıdır. Lakin qanunvericiliyə əsasən, ilkin yoxlamanı Vergilər Nazirliyi həyata keçirməli idi. Prokurorluğun işə cəlb edilməsi göstərir ki, hakimiyyət demokratik qüvvələrə, müstəqil jurnalistlərə, QHT-lərə və ictimai fəallara təzyiqləri davam etdirir.

Ümid Partiyası bütün bunları siyasi təzyiq kimi qiymətləndirir və QHT-lərin qorxudulması hesab edir.

Partiya baş verənləri pisləyir və SMDT-yə təzyiqlərə dərhal son qoyulmasını tələb edir, bu qurumu dəstəkləyəcəyini bəyan edir. -06D-