Vəfa Nağı, Şəhla Kərim və Seymur Abbas sərbəst buraxılıblar (yenilənib)

Saat 23.00 radələrində deputatlığa namizəd Vəfa Nağı, onun vəkili  Seymur Abbas və jurnalist Şəhla Kərim sərbəst buraxılıb.

Nağının Turan-a verdiyi məlumata görə, onlar qara maskalı mülki şəxslər tərəfindən saxlanılıb və ayrı-ayrılıqda üç qara avtomobilə yerləşdirilib.

Nağının  sözlərinə görə, ondan "seçkilər artıq bitdiyi üçün" etirazını dayandırması istənilib.

Nağı isə öz növbəsində şikayətlərin araşdırılmasını tələb etdiyini bildirib.

“Bizdə olan məlumata görə, dairə seçki komissiyası rəqibimin müşahidəçilərini çağırıb onlardan “seçkilərin demokratikliyi” ilə bağlı ərizələr alır. Amma  pozuntuları qeydə almış mənim müşahidəçilərimi çağırmırlar”, - Nağı bildirib.

O qeyd edib ki, saxlanılan şəxslər üç saat  sonra Bakıya gətirilib və  Əhmədlidə sərbəst buraxılıb. Bütün bu müddət ərzində  saxlanılanların telefonları əlindən alınıb.

Nağı hüquq-mühafizə orqanlarına şikayət edəcəyini bildirib.

Öz növbəsində Kərim Turan-a bildirib ki, saxlanılan şəxslər maşına mindirilərkən onlara qarşı kobud güc tətbiq edilib.

Jurnalistin sözlərinə görə, hətta maşında olarkən, mülki geyimli şəxslər onun əllərini tutub saxlayıb.

Kərim də ona qarşı bu hərəkətlərdən şikayət etmək niyyətindədir.
 

* * *

Vəfa Nağı və Şəhla Kərim Neftçalada saxlanılıblar

2024-09-06 21:09

Milli Məclis seçkilərində 70 saylı Neftçala dairəsindən namizəd olmuş Vəfa  Nağı (Nağıyeva) saxlanıldığı bildirilir. 

V.Nağı bu gün günorta saatlarında 70 saylı Dairə Seçki Komissiyasının binasının qarşısında çadır qurub etiraz aksiyasını keçirmişdi. 

Yaxınlarının məlumatına görə, axşam saatlarında oradan açılmış canlı efir zamanı o və hadisə yerində olan reportyor Şəhla Kərim saxlanılıblar. 

Hazırda namizədin və reportyorun harada olduqları məlum deyil. 

Daxili İşlər Nazirliyinin mətbuat xidmətinin regional qrupundan Turana bildirilib ki, Neftçalada Şəhla Kərim adda jurnalist saxlanılmayıb.