Vəkil G.Əhmədovanın əmlakının müsadirə edilməsi barədə məlumatları təkzib edir

Hazırda həbsdə olan sabiq millət vəkili Gülər Əhmədovanın əmlakının siyahıya alınması və müsadirə olunması barədə məlumat həqiqətə uyğun deyil. Bu barədə Turan-a Əhmədovanın vəkili Eldar Qədimi bildirib.

“Gülər Əhmədovanın əmlakının siyahıya alınması barədə məlumatlar yalan və şaiyədir. Şaiyələrə inanmayın”, deyə vəkil öz fikrini bildirib.

Onun sözlərinə görə, qanunvericilik baxımından əmlakın müsadirəsinə ehtiyac duyulduğu barədə yalnız məhkəmə qərar çıxarda bilər.

Əhmədovanın səhhəti ilə bağlı suala cavabda vəkil fevralın 19-da təcridxanada Gülər Əhmədova ilə görüşəcəyini və səhhəti barədə bundan sonra məlumat verə biləcəyini deyib.

Bundan başqa, yaxın günlərdə həbs-qətimkan tədbirindən verilmiş apellyasiya şikayətinə baxılacaq.

Yerli KİV-lərin məlumatına görə, Əhmədovanın kommersiya qurumları və daşınmaz əmlak obyektləri gizli surətdə əlindən alınır.

Əhmədova “deputat mandatı ticarəti” ilə bağlı video-qalmaqalla bağlı həbs edilib, CM-in 178.3.2 (fırıldaqçılıq, başqasının əmlakını mənimsəmə, etibardan sui-istifadə) və 307.2-ci (cinayətin qəsdən gizlədilməsi) maddələri ilə ittiham olunur. Məhkəmə onun 3 ay müddətinə həbsinə qərar verib. -16B06-