Vəkil Qurban Məmmədov həbs edilib

 İyunun 4-də Nəsimi Rayon Məhkəməsi tanınmış vəkil Qurban Məmmədovun  barəsində həbs qətimkan tədbiri – 2 ay müddətinə həbs cəzası seçib. O, Cinayət Məcəlləsinin 263.1 maddəsi ilə (yol hərəkəti və istismarı qaydalarının pozulması, ehtiyatsızlıqdan zərərçəkmişin sağlamlığına az ağır ziyanın vurulmasına səbəb olma) təqsirli bilinir. Bu barədə Turan-a onun qardaşı, Demokrat Partiyasının sədri Sərdar Cəlaloğlu məlumat verib.

Onun sözlərinə görə, Q.Məmmədov bir il əvvəl baş vermiş avtomobil qəzasına görə təqsirli bilinir. Belə ki, avtomobili geri çəkərkən bilmədən dayanacağın işçisini vurub. Sonuncunun ayağı sınıb. Müalicə xərclərini Q.Məmmədov ödəyib.

“Buna baxmayaraq, bir ildən sonra dayanacaq işçisinə və şahidlərə təzyiqlər göstərilir ki, onlar Q.Məmmədovun əleyhinə ifadə versinlər”, - S.Cəlaloğlu qeyd edib.

Onun dediklərinə görə, qardaşı siyasi motivlərlə həbs olunub. Hakimiyyətdəki müəyyən qüvvələr qəsdən hakimiyyətlə vətəndaş cəmiyyəti və müxalifət arasında münasibətləri gərginləşdirir ki, ölkədə sabitlik pozulsun, xarici qüvvələrin, əsasən də Rusiyanın intervensiyası imkanları yaradılsın.

S.Cəlaloğlunun sözlərinə görə, Q.Məmmədovun həbsinə heç bir lüzum yox idi. Əgər o, istintaqdan yayınmaq istəsəydi, bunu keçən il edərdi.

S.Cəlaloğlu diqqəti ona yönəldib ki, son vaxtlar Q.Məmmədov Milli Şuranın yaradılmasının fəal tərəfdarlarından olub.—06D--