Veyn Meri: Bakı ancaq özünə ziyan vurur

Amerika Şurasının Vaşinqtonda xarici siyasət üzrə baş eksperti Veyn Meri rəsmi Bakının Azərbaycan hakimiyyətindən icazə almadan Dağlıq Qarabağa səfər etmiş 335 əcnəbinin arzuolunmaz şəxs elan olunması qərarını pisləyib.

“Bununla ölkə hakimiyyəti özünə ziyan vurur”, deyə o, Turan-ın müxbiri ilə söhbətində bildirib.

“Qarabağa səfər edənləri dərhal Azərbaycana dəvət edib, onlara digər tərəfin mövqeyi ilə tanış olmağı təklif etmək, qaçqınları və onların problemlərini göstərmək daha doğru olardı”, deyə o qeyd edib.

“Hazırki siyasət əks təsir verəcək və “qara siyahıdakı” insanlar artıq çox istəsələr belə, Azərbaycanın mövqeyini öyrənə bilməyəcəklər.

Bu mövqe yalnız artmaqda olan özünütəcridin və son vaxtlar Bakının həyata keçirdiyi primitiv siyasətin bir nümunəsidir”, deyə ekspert bildirib.

Meri 20 ildən çox Dövlət Departamentində və ABŞ-ın müdafiə qurumlarında xidmət göstərib, keçən il Qarabağa səfər edib. Sonradan o, bir sıra məqalələrində vəziyyətə baxışını təsvir edərək, beynəlxalq ictimaiyyəti bu münaqişənin həllinə daha çox diqqət yetirməyə çağırıb.

Adını qara siyahıda görən Meri təəccüblənib, belə ki, onun münaqişə ilə bağlı fikri Azərbaycanın mövqeyinə kifayət qədər yaxın idi.

“Təəssüf edirəm ki, Azərbaycan hakimiyyəti mənim bu ölkəyə yolumu bağlayan addımlar atıb. Qarabağ münaqişəsi üzrə mövqeyimin qətiyyən erməniyönlü olmadığını nəzərə alsaq, bu, xüsusilə qəribədir”, deyə Meri qeyd edib.

Qeyd edək ki, yuxarıda adı çəkilən qara siyahıda 35 ABŞ vətəndaşının adı var. Onlar arasında jurnalistlər, ekspertlər, vətəndaş cəmiyyəti nümayəndələri və başqaları var.

Ən maraqlısı budur ki, onların bəziləri heç vaxt Qarabağda olmayıblar, Nikolas Vondra kimi.

“Mən Qarabağda olmamışam, amma bəzi həmkarlarım orada olublar. Əgər məni qara siyahıya salıblarsa, indi Qafqaz üzrə mütəxəssis olaraq oraya getmək lazımdır”, deyə Con Hopkins Universitetinin 16 tələbəsi arasında adı yer alan Nikolas Vondra Turan-ın müxbirinə bildirib.  -25В-