Xarici İşlər Nazirinin Yaxın Şərq regionuna səfəri zamanı hər-hansı sənəd imzalanmayacaq

Azərbaycan nümayəndə heyəti BMT Təhlükəsizlik Şurasının qeyri-daimi üzvü kimi Yaxın Şərq regionuna səfər edir. Səfər çərçivəsində həm Fələstində (Ramalla), həm də İsraildə yüksək səviyyədə görüşlər keçiriləcək. Bu barədə bugünki brifinqdə Azərbaycan Xarici İşlər Nazirliyinin mətbuat xidmətinin rəhbəri Elman Abdullayev nazir Elmar Məmmədyarovun regiona səfəri barədə danışarkən bildirib.

Xarici işlər naziri Elmar Məmmədyarov aprelin 21-24-də İsrail və Fəsləstində rəsmi səfərdə olacaq. 

E.Abdullayev deyib ki, Azərbaycan Yaxın Şərq regionunda baş verənləri yaxından izləyir və laqeyd qala bilməz. “Azərbaycan Fələstini dəstəkləyən və İsraillə əməkdaşlıq edən ölkədir. Azərbaycan daim Fələstinə yardım edir və yardımlarını davam etdirir, fələstinli tələbələrin Azərbaycanda təhsil almasını maliyyələşdirir, BMT və İslam Əməkdaşlıq Təşkilatı çərçivəsində Fələstinə yardım edir”, deyə o qeyd edib. 

Mətbuat katibi səfər zamanı hər-hansı sənədin imzalanmasının və diplomatik nümayəndəliklərin açılmasının nəzərdə tutulmadığını deyib. “Azərbaycan regionda gərginliyin azaldılmasının tərəfdarıdır”, deyə E.Abdullayev bildirib.

O, səfər zamanı İran məsələsinin müzakirə olunub-olunmayacağını söyləməyin hələ tez olduğunu deyib. “Azərbaycan İranla əməkdaşlığın hər zaman inkişafında maraqlıdır”, deyə o İranda Azərbaycan qarşı səslənən tənqidlərlə bağlı sualın cavabında bildirib. -03C-