Xələf Xələfov �Keşikçidağ� ətrafında vəziyyəti şərh edib

Bakı/27.05.19/Turan: Beynəlxalq hüquqa əsasən SSRİ-nin süqutundan sonra Azərbaycan Respublikası və Gürcüstan avtomatik olaraq aralarında mövcud olan əvvəlki inzibati sərhədlərin varisi olublar. Sonradan bu sərhədlər dövlət sərhədləri olub və iki ölkənin sərhəd xidmətlərinin nəzarəti altına keçib. Bu fikri Azərbaycan xarici işlər nazirinin müavini Xələf Xələfov jurnalistlərin xahişilə gürcüstanlı həmkarının "delimitasiya üzrə komissiyanın bu yaxınlardakı iclasında status-kvonun hər hansı şəkildə dəyişilməsi barədə təsəvvürün meydana gəlməsinə xidmət edən addımların atılmamasının vacibliyi məsələsini qaldırdıq" bəyanatını şərh edərkən söyləyib.

"Keşikçidağ" hissəsində sərhəd həmişə olub və o, Azərbaycan və Gürcüstan sərhəd xidmətləri tərəfindən qorunub və qorunmaqda davam etdirilir", - X.Xələfov deyib.

"Gürcüstanlı zəvvarların "Keşikçidağ" qoruğunun ərazisində yerləşən mağaralara keçidləri, gürcü tərəfinin xahişinə və qarşılıqlı razılaşmaya əsasən Azərbaycan sərhədçilərinin nəzarəti altında gerçəkləşirdi. Belə vəziyyət bu gün də davam edir. Öz ərazisində bəzi təsərrüfat və ya digər işlərin həyata keçirilməsinə gəldikdə isə bu, hər bir tərəfin suveren hüququdur", - azərbaycanlı diplomat bildirib.

Qeyd edək ki, son günlər Gürcüstanın bəzi ictimai və din xadimləri Azərbaycan tərəfinin "Keşikçidağ" qoruğuna tərəf avtomobil yolu çəkməsilə bağlı narazılığını bildirib.-06D--