Xələf Xələfov: �Keşikçidağ� məsələsi hüquqi müstəvidə həll olunacaq

Bakı/10.05.19/Turan: Azərbaycan və Gürcüstanın sərhədlərin delimitasiyası üzrə nümayəndə heyətlərinin rəsmi danışıqları gələn həftə olacaq. Bu barədə Azərbaycan xarici işlər nazirinin müavini Xələf Xələfov bu gün jurnalistlərə bildirib.

"Biz 1996-cı ildən gürcü tərəfiylə bu məsələ ilə məşğul oluruq. Həmin vaxtdan intensiv danışıqlar gedir və sərhəddin 2/3 hissəsi müəyyənləşdirilib", - X.Xələfov deyib.

Onun sözlərinə görə, sərhədlərin delimitasiyası dövlət səviyyəli məsələdir, ictimai müzakirə məsələsi deyil.

"Bu, ciddi dövlətlərarası münasibətlər məsələsidir. Din və ya tarix məsələlərilə bağlı kiminsə fikirlərindən asılı deyil. Məsələ ancaq hüquqi müstəvidə həll oluna bilər", - o, "Keşikçidağ" kompleksi (David Qareci) ətrafında yaranmış vəziyyətə münasibətini bildirərkən deyib.

Onun sözlərinə görə, 100 ildən çoxdur ki, Azərbaycan və Gürcüstan həmin sərhədlər çərçivəsində yaşayır. "SSRİ dönəmində və SSRİ-nin süqutundan sonra biz həmin sərhədlər çərçivəsində yaşamışıq. Təbii ki, həmin sərhədlərin mövcudluğuna dair müvafiq hüquqi sənədlər var. Odur ki, bu məsələlər hüquqi müstəvidə həll olunacaq. Bundan əlavə, Azərbaycan və Gürcüstan arasında dost münasibətləri var. Gürcüstanla bizi strateji tərəfdaşlıq münasibətləri birləşdirir", - X.Xələfov vurğulayıb.-06D--