XİN-də böhran və ya diplomatın öz fikri ola bilərmi?

Azərbaycan XİN azərbaycanlı diplomat, İƏT-in Aİ missiyasının rəhbəri Arif Məmmədovun paylaşdığı statusla bağlı xidməti araşdırmaya başlayıb.

Xatırladaq ki, Məmmədov mayın 19-da Bakıda 15 nəfərin həyatına son qoymuş yanğınla bağlı tənqidi status yazaraq, buna görə məsuliyyəti məmurların üzərinə qoyub. Lakin hökumətyönlü KİV bunu az qala hökumət əleyhinə qəsd və inqilab hazırlığı adlandırıb.

Son günlər mətbuat üçün tamamilə əlçatmaz olan XİN-in rəsmi nümayəndəsi Hikmət Hacıyev hakimiyyətyönlü KİV-ə bildirib ki, Arif Məmmədovun sosial şəbəkələrdəki bəyanatı dəqiqləşdirilir.

“Əgər məlumat təsdiqini tapacaqsa, A.Məmmədovun belə davranışı diplomat adına yaraşmır. Bu, qəbuledilməz, məsuliyyətsiz və qeyri-peşəkar davranışdır”, deyə hökumətyönlü KİV Hacıyevdən sitat gətirir.

Lakin Məmmədovun facebook səhifəsində görünür ki, diplomatın fikrini “layk” edənlər arasında Hikmət Hacıyev də var. Ola bilər ki, bu, XİN-in mətbuat katibi ilə eyni ad və soyada malik başqa şəxsdir, amma mətbuat katibi əlçatmaz olduğu üçün bunu yoxlamaq mümkün olmayıb.

Necə olursa olsun, məşhur diplomat ətrafında qalmaqal hakimiyyətdə növbəti sistem böhranına səbəb olub. Bu, ondan ibarətdir ki, dövlət məmuru öz fikrinə malik olmamalıdır. Daha doğrusu, bu fikir yalnız müsbət olmalıdır. Fikir mənfidirsə, birinci şəxslərin mövqeyini təkrar etsə belə, bu fikir yolverilməzdir.

Belə çıxır ki, mahiyyətcə dövlət başçısının məmurların ünvanına tənqidini təkrar etmiş Məmmədov dövlət aparatı tərəfindən “inqilabçı” və “sui-qəsdçi” kimi qəbul edilir. -06D-