Yeni geosiyasi reallıqlar Azərbaycanla Rusiya arasında münasibətlərə təsir etməyib - İ.Əliyev

Bakı/21.07.23/Turan: Ötən ilin fevralında imzalanmış müttəfiqlik əməkdaşlığı haqqında Bəyannamə Rusiya ilə Azərbaycan arasında münasibətlərin yeni mərhələsidir. Bu sözləri Azərbaycan Prezidenti İlham Əliyev “4-cü Sənaye İnqilabı dövründə Yeni Media” mövzusunda Şuşa Qlobal Media Forumunda çıxışında deyib

Eyni zamanda, Əliyev qeyd edib ki, sənəd “dünya, regionumuz, o cümlədən Rusiya və Azərbaycan üçün tamamilə yeni dövrdə” imzalanıb. “Amma buna baxmayaraq, geosiyasi vəziyyətin belə ciddi dəyişməsinə baxmayaraq, Bəyannamənin imzalanmasından sonra Rusiya ilə Azərbaycan arasında münasibətlərin inkişafı kifayət qədər uğurlu olub. Ən yüksək səviyyədə çoxlu təmaslar olub, hökumət başçıları, xarici işlər orqanlarının rəhbərləri, hökumət və ictimai strukturların digər nümayəndələri səviyyəsində əlaqələr olub. Ona görə də əminliklə deyə bilərəm ki, Bəyannamənin bəndləri həyata keçirilir”, - deyə Azərbaycan Prezidenti vurğulayıb.

Eyni zamanda, Əliyev qeyd edib ki, “Rusiya mətbuatında Azərbaycana münasibətdə, Azərbaycan mətbuatında isə Rusiyaya münasibətdə gördüyümüz o kiçik nahamarlığın iki ölkənin siyasətinə heç bir təsiri yoxdur”. 06B