Yeni sədr fraksiyaçılığın partiya maraqlarına uyğun olmadığını iddia edir

Müsavat Partiyasının sədri Arif Hacılı partiyanın rəhbəri kimi cümə günü ilk mətbuat konfransını keçirib.

İlkin olaraq Qarabağ münaqişəsinin tənizmlənməsinə toxunan A.Hacılı bu məsələdə imitasiya siyasətinə son qoyulması bəyanatı səsləndirib. A.Hacılı kəlbəcərli girovların məhkəməsini məhkəmə deyil, məzhəkə adlandırıb.

Bundan əlavə, Müsavat başçısı siyasi məhbus məsələsinə toxunaraq, Müsavat Partiyasından olan bütün siyasi dustaqların azad olunmasını tələb etdiklərini söyləyib.

A.Haclı Ukrayna parlamentinə olan seçkiləri “avrointeqrasiya tərəfdarlarının qələbəsi” kimi dəyərləndirib. O, yaxın günlərdə Azərbaycanda avrointeqrasiya məsələsinin aktuallaşacağını nəzərə çatdırıb.  

Müsavat rəhbəri partiya qurultayındakı seçkilərdən danışaraq seçkinin azad keçdiyini söyləyib, bu seçkiləri əsl demokratiya nümunəsi kimi dəyərləndirib.

A.Hacılı yaxın vaxtlarda partiya strukturlarına yeni rəhbərlər təyin ediləcəyini və partiya rəhbərlyinin tam dəyişdirləcəyini vurğulayıb.

Müsavat sədri qurultaydan sonra Məclisin ilk iclasının keçirildiyini deyib, yaxın vaxtlarda zona müşavirələrinin keçiriləcəyinə, rayon təşkilatlarının fəaliyyətinin gücləndiriləcəyinə diqqət çəkib. A.Hacılı müxalif siyasi partiyalarla o cümlədən AXCP ilə müttəfiqlik yönündə addımlar atmaq niyyətində olduğunu bildirib.

Müsavat Partiyası daxili fraksiya yaradılması təşəbbüslərinə toxunan A.Hacılı partiya Nizamnaməsində fraksiya yaradılması nəzərdə tutulmadığını deyib. Fraksiya yaradılmasının partiya maraqlarına uyğun olmadığını iddia edib. “Kimlər fraksiya fəaliyyəti niyyətinə düşsələr, partiya üzvlərinin qarşısında bir qədər də nüfuzdan düşəcəklər”, - deyə A.Hacılı fraksiya tərəfdarlarına xəbərdarlıq edib. -05D-