Yevlaxda sosial şəbəkə istifadəçisi Elşən Kərimov saxlanılıb

Azərbaycanın Yevlax rayonunda sosial şəbəkələrin fəal iştirakçısı Elşən Kərimov saxlanılıb. Bu barədə onun qardaşı Pərviz Kərimov məlumat verib. 

Onun sözlərinə görə, Elşən artıq 30 ildir Rusiyada yaşayır, kiçik sahibkarlıqla məşğuldur və Rusiya vətəndaşlığı var. Dünən Azərbaycana atasının yasına gəlib və elə aprelin 17-də Rüstəmli kəndində saxlanılıb.

"Elə yasın ortasında mülki geyimli, qara maskalı adamlar gəlib "əcnəbilərin qeydiyyatı" adı ilə Elşəni aparıblar. Telefonunu da əlindən alıblar", deyə P.Kərimov bildirib.

Qohumlarının Elşən Kərimovun aqibəti haqqında məlumatı yoxdur. 

"Rayon prokurorluğuna getdik. Orada bizə dedilər ki, Elşən Bakıya göndərilib", deyə qardaşı bildirib. 

O qeyd edib ki, Elşənin ailə üzvləri Moskvadadır və onlar onun taleyinə aydınlıq gətirmək üçün müvafiq orqanlara müraciət ediblər. 

Hüquq-mühafizə orqanlarından şərh almaq mümkün olmayıb.

Bəzi məlumatlara görə, E.Kərimov Azərbaycan Xalq Cəbhəsi Partiyasının tərəfdarıdır. Sosial şəbəkələrdə bu partiyanın fəallarının həbsləri haqqında məlumatlar paylaşır, Azərbaycanda bütün siyasi məhbusların azad edilməsini tələb edirdi".