Zamin Salayev həbsdə aclıq elan edib

Xalq Cəbhəsi Partiyasının (AXCP) fəalı Əlizamin Salayev hakimiyyətin COP29 iqlim konfransı ərəfəsində siyasi məhbusları azad etməkdən imtina etməsinə etiraz əlaməti olaraq oktyabrın 30-dan etibarən həbsxanada aclıq edir. Bu barədə onun həyat yoldaşı Səidə Salayeva bildirib.

"Əlizamin telefon söhbətində oktyabrın 30-dan aclıq etdiyini deyib. O, bütün digər siyasi məhbuslar üçün də azadlıq tələb edir", deyə həyat yoldaşı bildirib.

Salayeva ürəyində, qaraciyərində problemlərlə əlaqədar Penitensiar Xidmətin Müalicə Müəssisəsinə köçürülüb. "Onun təngənəfəsliyi var, ayaqları şişib, o, çətinliklə hərəkət edir", deyə Salayeva bildirib.

Azadlıq qəzetinin facebook hesabında Salayevin AXCP rəhbərliyinə və yoldaşlarına əl yazısı ilə yazdığı məktubun faks surəti dərc olunub. O, məktubda aclıq elan etdiyini bildirir və bunun səbəblərini açıqlayır.

O, ölkədə 319 siyasi məhbus olduğu, insan hüquqları pozulduğu, korrupsiya tüğyan etdiyi bir halda Azərbaycanda COP29 keçirilməsini və demokratik dövlətlərin vətəndaşlarının onda iştirak etməsini yolverilməz hesab edir.

* Salayev 2023-cü il fevralın 7-də "xuliqanlıq, silah qismində istifadə olunan əşyadan istifadə ilə törədildikdə" ittihamı ilə həbs edilib. O, əsassız həbsinə etiraz əlaməti olaraq 114 gün aclıq edib.

22 may 2023-cü il tarixində məhkəmə onu 4 il müddətinə azadlıqdan məhrum edib. Hüquq müdafiəçiləri onu siyasi məhbus kimi tanıyıblar.