Abbas Hüseynovun anası oğlunun azad edilməsi xahişi ilə prezidentə müraciət edib

Müsəlman Birliyi Hərəkatının həbsdə olan keçmiş funksioneri Abbas Hüseynovun anası Rəhimə Hüseynova Prezident İlham Əliyevə və vitse-prezident Mehriban Əliyevaya müraciət edərək oğlunun azad edilməsini xahiş edib.

“Son çarə olaraq,üzümü sizə tutub müraciət edib xahiş edirəm ki, övladımın azad edilməsi üçün lazımı göstərişləri verəsiz. Çünki vətənimizdə məhbusların azadlığa buraxılması sizin iradəniz əsasında baş verir, bu günə kimi minlərlə məhkumun azadlığa buraxılmasında vasitəçi olmusunuz. Və qarşıdakı günlərdə imzalana biləcək əfv sərəncamında balamın da adın görmək mənim arzumdur. İnanıram ki, iradəniz əsasında övladıma qovuşmaq mənə də nəsib olacaq”, Rəhimə Hüseynovanın müraciətində  qeyd edilir.

Abbas Hüseynov 2015-ci il noyabrın 26-da "Nardaran hadisələri" zamanı həbs olunub və 20 il azadlıqdan məhrum edilib. O, terrorçuluq, qanunsuz silah-sursat saxlama və başqa ağır ittihamlarla təqsirləndirilsə də, ittihamların heç birini qəbul etmir və siyasi sifarişlə həbs olunduğunu bildirir.

Hüseynov cəzasını qapalı rejimli həbsxanada çəkir.

“Oğlumun həbsdə olduğu 8 ildə nə onun, nə də mənim, ailəmizin günü-güzaranı olmayıb. 8 ilin hər bir günü, saatı mən nigarançılıq içində olmuşam. Çünki həbs olunan insan ilə birlikdə sanki onun ailəsi də qazamata salınmış kimi olur”, ana qeyd edib.-03-