Ekologiya Nazirliyinin Alpinizm Federasiyasının ünvanına söylədiyi fikirlərlə bağlı aşağıdakıları bildiririk:
“Bu günlərdə Ekologiya Nazirliyi Azərbaycan Alpinizm Federasiyasının növbəti tədbirini – bu il oktyabrın sonlarında Şahdağ ərazisində keçirilməsi nəzərdə tutulan təlim-məşq yığmalarını növbəti dəfə pozub.
Tədbir başlamazdan əvvəl müəyyən edilmiş müddətdə (ən az 10 gün əvvəl) AF Ekologiya və Təbii Sərvətlər Nazirliyinə buraxılış almaq üçün məktub göndərib. Lakin yığmalar başlayana qədər heç bir rəsmi cavab veriməyib. Əlimizdə icazə olmadan biz yığmalara başlaya bilmədik.
Yalnız bir həftə sonra Ekologiya Nazirliyi AF-yə Şahdağ ərazisində hər-hansı tədbirin keçirilməsindən imtina barədə məktub göndərib. Səbəb kimi Alpinizm Federasiyası üzvlərinin “sosial şəbəkələrdə Ekologiya Nazirliyinə qarşı qara piar kampaniyası həyata keçirdikləri” göstərilib.
Ekologiya Nazirliyinin departament direktoru V.Cavadovun imzası ilə göndərilən rəsmi məktubdan belə çıxır ki, bu bölgəyə getməyə icazə almaq üçün “özünü məsuliyyətli apara bilənlər” müraciət edə bilər. Cavabın sonunda deyilir ki, gələcəkdə Ekologiya Nazirliyi yalnız “özünə və üzvlərinə görə məsuliyyət daşıyanlarla” işləyəcək.
Qeyd edək ki, Ekologiya Nazirliyi Milli Park zonasında illərlə yığılmayan zibilin fotoşəkillərini “qara piar” hesab edir. Gənclər zibilin şəklini facebook sosial şəbəkəsindəki səhifələrdən birində yerləşdiriblər (Azərbaycan və digər ölkələrin alpinistlər və qayayadırmananlar birliyi).
Buna cavab olaraq ekologiya nazirinin rəhbərlik etdiyi Hava və Ekstremal İdman Növləri Federasiyasının (FAİREX) nəzarətində olan səhifələrdə fotoşəkilləri dərc edən gənc fəalların ünvanına milli mənsubiyyətlə bağlı təhqirlərlə ləkəyaxma aksiyası başlayıb. Milli azlıqları təmsil edən, milli multimədəniyyət və tolerantlıq siyasəti ilə qorunan Azərbaycan vətəndaşları cəmiyyətimizin dəyərlərini sarsıdan təhqirlərə məruz qalıblar.
Ekologiya Nazirliyi – FAİREX-in bu vəziyyətdə sensor rolunda çıxış etmək cəhdləri boş görünür. Bu idarə mövcud nöqsanları göstərənlərin ağzını yummağa çalışmaq yerinə, onlara təşəkkür etməli idi (əgər həqiqətən Ekologiya Nazirliyi bu nöqsanları gizlətmək istəmirsə).
AF bu əməlləri FAİREX-ə sədrlik edən Ekologiya Nazirliyi tərəfindən növbəti dəfə tədbirin qəsdən pozulması cəhdi kimi qiymətləndirir.
Bu, birinci dəfə deyil ki, baş verir. Belə ki, 2011-il mövsümündə Ekologiya Nazirliyi 80-dən çox adamın iştirakı ilə Milli Ordu gününə həsr olunmuş alpinist toplantılarının keçirilməsi barədə müraciətimizə məhəl qoymayıb. O zaman idmançılar qonşu Gürcüstana getməyə məcbur oldular və iyunun 26-da bu ölkənin zirvələrindən birində Azərbaycanın milli bayrağını qaldırdılar.
Bu il Ekologiya Nazirliyi sadəcə təlim toplantısını deyil, həm də Azərbaycan milli Himalay komandasının hazırlıq qrafikini pozub. Belə ki, yığma 2013-cü ildə ölkə tarixində ilk dəfə olaraq Azərbaycan Himalay ekspedisiyasını tam həyata keçirəcək.
Bununla yanaşı, FAİREX rəhbərliyi ölkənin 50 illik tarixi olan ən qədim federasiyalarından birinə iftira atmaqdan yorulmur. Azərbaycan alpinistlərinin nailiyyətlərinin əhəmiyyətini kiçiltməyə və aradan qaldırmağa çalışır. Tribunalardan bizim federasiyanın Azərbaycanda alpinizmi “bərbad vəziyyətə saldığını” bəyan edərək, ən böyük beynəlxalq idman qurumlarını qəsdən yanıldır, UİAA-ya (Beynəlxalq Alpinizm Federasiyası) təkcə AF-ə deyil, digər ölkələrin nümayəndələrinə də kölgə salan təhqiredici məktublar yazır, sistemli bir şəkildə AF rəhbərini başqa ölkədə yaşamaqda ittiham edir və ən pisi, AF rəhbərliyini milli maraqları satmaqda ittiham edir.
Biz uzun müddət güzəşt yolları axtardıq və qarşıdurmadan qaçdıq və İdman və Gənclər Nazirliyinin vasitəçiliyi ilə centlmen sazişi əldə olundu: bütün respublika yarışlarını İdman Nazirliyinin himayəsi altında, hər iki federasiyanın qüvvəsi ilə birgə keçirmək və bir-birinə mane olmamaq. Lakin əməldə belə olmadı. Artıq iki ildir ki, AF 40 ildən çox keçirdiyi qayayadırmanma yarışlarının keçirilməsindən kənarlaşdırılıb”.
Bununla əlaqədar Azərbaycan Alpinizm Federasiyası bəyan edir:
“Biz əminik ki, FAİREX-in FA-ya qarşı siyasəti aqressiv, qeyri-dost və reyderlik xarakteri daşıyır.
Belə ki, AF-in müxtəlif tədbirlərində iştirak etmək istəyən FAİREX üzvlərinə bu, faktiki olaraq, qadağan edilib. Bundan başqa FAİREX rəhbərliyi AF-nin tədbirlərini pozmaq üçün çəkinmədən inzibati resurslardan istifadə edir, federasiyanın səlahiyyətində olan sahələrə müdaxilə edir, tədbirlərimizin təkrarını keçirir, respublika və beynəlxalq səviyyələrdə bizdən alpinizimə aid sahəni (qayayadırmanma, buzadırmanma və s.) almağa çalışır.
Bu, Azərbaycan Respublikasının idman haqqında qanununun pozuntusudur. Bu qanuna əsasən, bir idman növü yalnız bir federasiyada təmsil edilə bilər.
Buna baxmayaraq, FAİREX rəhbərliyi dağ idman növlərinin – alpinizm və qayayadırmanmanın onun idarəetməsində olduğunun və onun razılığı olmadan heç bir alpinizm tədbiri keçirilə bilməyəcəyinin etiraf edilməsini tələb edir. Bununla eyni zamanda, Ekologiya və Təbii Sərvətlər Nazirliyinin şəxsində bütün dövlət resurslarından FAİREX-ə dəstək üçün istifadə olunur.
Biz Azərbaycanın Gənclər və İdman Nazirliyini və ölkə ictimaiyyətinin diqqətini FAİREX rəhbərliyinin yolverilməz davranışına çəkməyə və onun reyderlik siyasətinə son qoymağa çağırırıq.
Biz həmçinin səlahiyyətli orqanları mətbuatda və İnternetdə sistemli şəkildə dərc olunan, AR vətəndaşlarının konstitusiya hüquqlarını pozan təhqirlərə diqqət yetirməyə çağırırıq”. --
Rəy yaz