Azərbaycan Beynəlxalq Bankının keçmiş sədri Cahangir Hacıyevin bacısı yenidən respublika prezidentinə müraciət edib

Azərbaycan Respublikasının Prezidenti

Cənab İlham Əliyevə

Hörmətli, cənab Prezident!

Sizə yenidən müraciət etmək, kömək və yardımınızı istəmək məcburiyyətindəyəm.

Bir sıra ağır xroniki xəstəliklərdən əziyyət çəkən qardaşım Cahangir Hacıyev səkkiz il yarımdır ki, həbsdədir. Səkkiz ildir ki, biz Penitensiar Xidmətin ona minimal tibbi yardım göstərilməsini və həkim nəzarətini təmin etməsinə nail olmağa çalışırıq. Bu illər ərzində o, dəfələrlə ürəkağrısı, təzyiq, hipertonik böhranlar, hormonal, immunitet sistemlərinin kəskinləməsi və mədəaltı vəzi tutmalarına məruz qalıb. Hətta bir dəfə təcili yardım çağırıblar. Dəfələrlə müraciətlərimizə baxmayaraq, onu mərkəzi tibb müəssisəsinə və koloniyanın özündəki sanitariya hissəsinə köçürməkdən imtina edirlər.

Hazırda onu hətta minimal yaşayış və yemək şəraitindən məhrum ediblər. Vəziyyəti kəskin şəkildə pisləşib. Mayın 1-dən ac qalır və vəziyyəti hər gün pisləşir. Bizim (mənim və vəkillərin) müraciətlərimizə baxmayaraq, Penitensiar Xidmətin rəhbəri bizi qəbul etmir. Odur ki, belə təəssürat yaranır ki, kimsə Cahangiri fiziki olaraq məhv etməyi qərara alıb.

Böyük ümidlə sizin qərarınızı gözləyəcəyəm.

Dərin hörmətlə, Əminə Hacıyeva