Biləsuvarda Monte Melkonyanı öldürən şəhidin ailəsinin necə "qayğısına qalırlar"

İki il əvvəl Biləsuvar Rayon İcra Hakimiyyətinin və Əmək və Əhalinin Sosial Müdafiəsi Nazirliyinin nümayəndələri Birinci Qarabağ müharibəsinin qəhrəmanı, şəhid Şaiq Kəlbiyevin evinə gəliblər və hakimiyyətin bu ailə üçün yeni ev tikmək niyyətində olduğunu bildiriblər.  

Onlarla birlikdə gələn hansısa tikinti şirkətinin mühəndisləri ölçmələr həyata keçiriblər və köhnə evin sökülməli olduğunu, onun yerində isə dərhal yeni ev tikəcəklərini deyiblər.

Ev sahibləri dövlət orqanlarının nümayəndələrinin təminatlarına inanaraq, yeni evin tikiləcəyi ümidi ilə onların köhnə evi sökməyinə icazə veriblər. Lakin iki ildir ki, heç bir tikinti aparılmır. Bütün bu müddət ərzində şəhidin tənha anası, 75 yaşlı Solmaz Abbasova qohumlarının yanında qalmaq məcburiyyətindədir.

Onun Prezident Aparatına, Sosial Müdafiə Nazirliyinə və Biləsuvar Rayon İcra Hakimiyyətinə çoxsaylı şikayətləri nəticə verməyib. Çoxsaylı cavablarda şəhid ailəsinin uçotda olduğu və onun evitinin tikintisinə növbə çatmasını gözləməli olduğu deyilir. 

Şaiq Kəlbiyevin döyüşdüyü motoatıcı batalyonunun keçmiş komandiri, polkovnik Xətai Baxışev:

"Şaiq 258 nömrəli PDM-in ekipaj komandiri olub. 12 iyun 1993-cü il tarixində Ağdam rayonunun Mərzili kəndində bizim hərbiçilərimiz üstünlük təşkil edən erməni qüvvələri ilə döyüşə giriblər. Ağır itkilərdən sonra batalyonumuz Mərzili, Novruzlu və Yusifcanlı kəndlərini azad edib. 258 nömrəli PDM-in iki ekipaj üzvü - Şaiq Kəlbiyev və Asəf Mütəllimov erməni PDM-ni qənimət kimi ələ keçirib, lakin düşmən tərəfindən atəşə tutulub və həlak olub.

Elə həmin döyüşdə Şaiq Kəlbiyev erməni UAZ-na topdan atəş açıb, nəticədə məşhur erməni terrorçu Monte Melkonyan və onun köməkçisi ölüb. Bu qəhrəmanlığına görə Şaiq Kəlbiyev və Asəf Mütəllimov "Azərbaycan Bayrağı" ordeni ilə təltif olunub. 

Bu hadisə "258 nömrəli PDM-in ekipajı" adlı sənədli filmdə ətraflı təsvir olunub.

Bu gün bu qəhrəmanların adları unudulduğuna görə utanıram.

Biləsuvar Rayon İcra Hakimiyyəti və Sosial Müdafiə Nazirliyi tərəfindən şəhid ailəsinə belə münasibəti görməkdən utanıram. Sirr deyil ki, bu Nazirlik müharibə iştirakçılarının ehtiyaclarına məhəl qoymadığına görə çoxdan tənqid obyektinə çevrilib.

Ölkəmizdə Monte Melkonyanın öldürülməsində  Şaiq Kəlbiyevin və Asəf Mütəllimovun xidmətini öz adına çıxararaq onların qanını tapdalayan fırıldaqçıların olmasından utanıram.

Buna görə onların mükafatlar və yüksək adlar  almasından utanıram.

İnanmaq istəyirəm ki, müvafiq dövlət qurumları, nəhayət ki, oyanacaqlar və yaşlı şəhid anasının küncdə-bucaqda qalmaq məcburiyyətində olduğu bu bədnam vəziyyətə son qoyacaqlar", deyə polkovnik Xətai Baxışov bildirib.

Turan Agentliyi polkovnik Xətai Baxışovun və Şaiq Kəlbiyevin ailəsinə münasibətdə ədalətin bərpa olunmasını tələb edən bütün müharibə veteranlarının çağırışlarına qoşulur.