Hücumlar və böhtan davam edərkən ermənilər öz təbliğatını gücləndirir – Ramiz Mehdiyev

Bakı/31.08.20/Turan: Prezident Administrasiyasının keçmiş rəhbəri, hazırda Milli Elmlər Akademiyasının prezidenti olan Ramiz Mehdiyev karantin dövründə qızına toy etdikdən sonra özünü tənqidlərdən müdafiə etməyə davam edir.

Avqustun 28-də axşam saatlarında Elmlər Akademiyasının saytında dərc edilmiş növbəti məqalədə Mehdiyev ictimaiyyətə çağırış edir. Nəşrin mahiyyəti ondan ibarətdir ki, ermənilər yeni təxribatlara hazırlaşırlar və özlərinə sərf edən tezisləri beynəlxalq aləmə yeridirlər.

O, bir tərəfdən İlham Əliyevin siyasətinin və səylərinin ermənilərin səylərinə qarşı uğurla müqavimət göstərdiyini iddia edir. Digər tərəfdən, o yazır ki, Azərbaycan tərəfi ideoloji mübarizədə geridə qalır və Avropada ermənipərəst əhval-ruhiyyənin formalaşmasına qarşı müqavimət göstərmək üçün kifayət qədər iş görmür.

Mehdiyev ölkənin ziyali elitasını səmərəsi olmayan gecikmiş və primitiv addımlarda ittiham edir və diplomatlara və diaspor qurumlarının işçilərinə davranış dərsləri verir. Hamıya məlum olan həqiqətləri təkrar edən Mehdiyev hələ dünənə qədər onun tabeliyində olan hər kəsin birdən-birə oyanıb başqa cür hərəkət etməyə başlayacağına ümid edir.

Prezident Administrasiyasının keçmiş başçısı daha sonra “qəfildən” ölkədə Xarici Siyasət Konsepsiyasının olmadığını yada salır. Bir halda ki, cəmi 23 ay mövcud olmuş Azərbaycan Xalq Cümhuriyyətində belə əsərlər az deyildi.

O, həmçinin ziyalıları erməni təbliğatına qarşı kifayət qədər müqavimət göstərməməkdə ittiham edir və ritorik sual verir: məgər erməni təcavüzü mövzusunu beynəlxalq KİV-lərin diqqət mərkəzində saxlamaq bu qədər çətindir?

Bu sahədə dövlət başçısının rolunu qeyd edən Mehdiyev İlham Əliyevi bu qədər məsuliyyətli məsələdə tək qoymamağa çağırıb.

Uzun illər təbliğat mənbələrə deyil, emosiyalara, pafosa söykənib. Azərbaycan tarixçiləri Türkmənçay və Gülüstan müqavilələrinə qədər Azərbaycan ərazisində ermənilərin olmadığını sübut etməyə çalışır. Eyni zamanda onlar iddia edirlər ki, erməni Qriqoryan kilsəsinin əsası 1441-ci ildə Eçmiadzində Qaraqoyunlu hökmdarının razılığı ilə qoyulub. Səfəvilərin və Əfşarların erməni əhaliyə imtiyazlar verdiyi barədə onlarla sənəd var. Bütün bunlar niyə unudulub?, deyə Mehdiyev sual edir.

Daha sonra o, bu mövzuda dərin analitik materiallar olmadığına görə ölkə KİV-lərini tənqid edir. Hökumətdən daimi maliyyə dəstəyi, mənzillər və digər nemətlər alan KİV boş, təkrarlanan və faydasız materiallar dərc edir, deyə Mehdiyev yazır.

Ramiz Mehdiyevin bu tənqidi kimə ünvanladığı aydın deyil. Məsələ ondadır ki, bu sahə - ideologiya, KİV, təbliğat, elm və bütün digər sahələr onillər boyunca onun tabeliyində olub. Bu sahələrdə qərarları məhz o qəbul edib, təyinatları o həyata keçirib və strategiyanı o formalaşdırıb. Bu gün mövcud olan hər şey Mehdiyevin əməyinin bəhrəsidir.

Bütün əvvəlki illər ərzində o, yalnız nailiyyətlərdən danışır və anti-Qərb məqalələrində Azərbaycanın müsibətlərinin Qərbin öz ideologiyasını ölkəyə qəbul etdirmək cəhdlərindən irəli gəldiyinə işarə edirdi.

Yəqin ki, avqustun 18-də keçirilən toy mərasimindən sonra Mehdiyevə qarşı kəskin tənqid və təzyiq onu İlham Əliyevi yararlı olduğuna inandırmaq üçün belə şeylər düşünməyə vadar edir. Amma buna inanmaq çətindir. -0-