Məhkəmə zalından “akvarium”u təcili yığışdırın

Ermənistanın ombudsmanı Arman Tatoyan Bakı Ağır Cinayətlər Məhkəməsinin zalından çəkilmiş fotoşəkillərə baxaraq bəyanat verib.  Tatoyan diqqəti 2 iyun tarixli fotoya yönəldib. Fotoda təxribatçılar Lüdviq Mkrtçyanın və Alyoşa Xosrovyanın qoruyucu şüşə kabinədə (akvariumda) saxlandığı görünür. O bunu insan ləyaqətini tapdalayan fakt kimi qiymətləndirib. Tatoyan beynəlxalq instansiyalara müraciət edib, onun tərəfdarları iddia edirlər ki, Azərbaycanda erməni təxribatçıların hüquqları pozulur.

Vəkil Cavad Cavadov müttəhimlərin qoruyucu şüşə kabinədə saxlanmasının Avropa məhkəmə icraatı praktikasına zidd olduğunu hesab etmir. Avropada məhkəmə salonunda dəmir qəfəsi qanunsuz adlandırırlar.

Amma hüquq müdafiəçisi Arif Yunusov Turan-a müsahibəsində bu fikirlə qətiyyən razı olmadığını deyib. O, çoxsaylı presedentləri yada salıb. Belə ki, postsovet ölkələrində (Gürcüstan, Ermənistan və Rusiyada) vəkillər öz müttəhimlərinin (2009-cu ildə “Ramiaşvili və Koxeidze Gürcüstana qarşı” işi üzrə; 2010-cu ildə “Aşot Arutyunyan Ermənistana qarşı” işi üzrə; 2011-ci ildə “Xodorkovski Rusiyaya qarşı” işi üzrə, 2018-ci ildə “Kovyazin Rusiyaya qarşı işi” üzrə və sair) adından akvariumda saxlanmaqla bağlı Avropa İnsan Hüquqları Məhkəməsində iddia qaldırıblar, hətta belə işləri qazanmağa müvəffəq olublar.

Avropa İnsan Hüquqları Məhkəməsi qərar çıxarıb ki, belə müttəhimlərin məhkəmə zalında qəfəsdə (dəmir və ya şüşə, yəni,  akvariumlar) saxlanması Avropa İnsan Hüquqları və Əsas Azadlıqların Müdafiəsi Haqqında Konvensiyanın 3-cü maddəsinin kobud şəkildə pozulmasıdır.

Rusiyada isə Avropa İnsan Hüquqları Məhkəməsinin bütün bu qərarlarından sonra 2018-ci ildə müttəhimlərin bu cür kabinələrdə (şüşə və ya dəmir) yerləşdirilməsinin qadağan edilməsi barədə qərar layihəsi Dövlət Dumasına təqdim olunub.  Hazırda layihə bütün instansiyalardan keçib və yekun mərhələdədir.

Bundan əlavə, müttəhimlər Arif və Leyla Yunusları müdafiə edən azərbaycanlı vəkillər məhkəmə iclasları zamanı şüşə kabinələrdə yerləşdirilmənin əleyhinə olaraq müraciət etmişdilər.

Bu qəbildən diqqəti çəkən iş Norveçdə terrorçu Breyvikin məhkəməsidir. O 77 uşağı qətlə yetirmiş, 151 nəfəri yaralamışdı və bunu inkar etmirdi.  Məhkəmə zamanı o, vəkilin yanında oturmuşdu. Qandalda deyildi, kostyumda idi və Avropada bu,  normal qəbul edilir.

"2017-ci ildə İlham Əliyevin fransız jurnalistlərə qarşı işi üzrə (onlar onu diktator adlandırmışdılar) prosesə məni xanımımla şahid qismində dəvət etdikdə, mən bizdə məhkəmələrin necə keçdiyindən, o cümlədən bu şüşə kabinələrdən danışmağa başladım.

Hakim şokda idi, uzun müddət inana bilmədi və nəticədə jurnalistlərin xeyrinə qərar qəbul etdi. Odur ki, Azərbaycanda bütün bunlara gülmək olar, amma xaricdə bu, onların hüquqlarının kobud şəkildə pozulması kimi qəbul edilir və belə də qəbul ediləcək", - hüquq müdafiəçisi deyib.

Arif Yunusov xəbərdarlıq edib ki, Bakıda hökm çıxarıldıqdan sonra Avropa İnsan Hüquqları Məhkəməsi erməni təxribatçıların şikayətinə baxacağı zaman avropalı hakimlər müttəhimlərin akvariumlarda saxlanmasına diqqət yetirəcəklər. O zaman bu fakt təxribatçıların azad edilməsi barədə qərarın çıxarılması üçün yetərli olacaq.

Arif Yunusov Avropa İnsan Hüquqları Məhkəməsi ilə sıx əlaqədə çalışır və əmindir ki, bizim məhkəmə məmurlarımızın savadsızlığı, onların müasir Avropa məhkəmə icraatı normalarını bilməməsi ucbatından erməni təxribatçılar Avropa məhkəməsində bəraət qazanacaqlar. Ona görə də Azərbaycan məhkəmələrində akvariumlar dərhal yığışdırılmalıdır.

“Biz boş yerə özümüz üçün problemlər yaradırıq, sonra isə deyirik ki, Avropa ikili standartlar yürüdür", - Arif Yunus fikrini yekunlaşdırıb.