![Qasımov Vidadi Kamal oğlu](https://turan.az/resized/media/2019/main/032600017730-750-500-resize.webp)
Qasımov Vidadi Kamal oğlu
- Söz istəyirəm
- 26 Mart 2019, 14:46
- 123
Şəki iqtisad məhkəməsinin sədri cənab Vidadi Qasımova
Möhtərəm cənab hakim,
sizi narahat edib vaxtınızı almağımın səbəbi martın 30-da sizin sədrliyinizlə Şəki iqtisad məhkəməsində "40 fermer Qaxın icra başçısı Musa Şəkiliyevə qarşı" iddiasına baxılmasıdr.
Hüquq müdafiəçisi kimi məhkəmə mühakiməsinin kənar təsirlərdən azad olmasının əhəmiyyətini gözəl anlayıram, eyni zamanda sıravi bir vətəndaş kimi hər hansı təsir imkanlarından məhrum olduğumu da dəqiq bilirəm. Bununla belə, mücərrəd bir məkanda deyil, Azərbaycanda yaşadığımızı anladığımdan, diqqətinizi aşağıdakı məqamlara çəkməyi özümə borc bilirəm.
1.40 fermer təsərrüfatının iflasına və məhvinə gətirəcək inzibati təıdbirlərin doğuracağı labüd fəsadları dərk etmək qabiliyyəti, görünür ki, Qaxın icra başçısı cənab Musa Şəkiliyevin və onun hamilərinin anlaq və bəsirətinə yaddır. Əks halda cənab Musa Şəkiliyev Azərbaycan Respublikasının qanunlarını və təbiət elminin danılmaz və qaçılmaz qaydalarını böylə açıq və aşkar pozmağa cəsarət etməzdi.
2.Yalnız kor və kar insan görmür ki, dövlətimizin düşmənləri onu içəridən laxlatmaq və dağıtmaq məqsədilə "milli azlıqların hüquqlarının Azərbaycanda pozulması" kartından sui-istifadə etməyə çalışırlar. Azərbaycanın ali siyasi rəhbərliyi bu təhlükəni görür və bu səylərin iflası naminə gərgin iş aparır. Milli azlıqların nümayəndələrinə milli çoxluğun nümayəndələri qədər bərabər yanaşma dövlət siyasətinin dəmir qanunudur. Beynəlxalq müstəvidə milyonlar xərclənir, birinci şəxslərin bilavasitə iştirakı ilə çoxsaylı tədbirlər keçirilir və milli bərabərliyin, anlaşma və qanacağın Azərbaycan dövlətinin təməl meyarları olması fikri bütün dünyaya təbliq edilir.
Belə olan halda, hansı zərurət, hansı naməlum yırtıcı məmurun hədsiz tamahı cənab Musa Şəkiliyevi vadar edir ki, əksəriyyəti saxur milli azlığına mənsub olan fermerlərin otlaq sahələrini onlardan alıb onları müflis etsin və düşmənlərin əlinə "Azərbaycanda milli azlıqların hüquqları pozulur" demək üçün şəksiz dəlil versin?
"Dövlət maraqları" barədə demaqogiya üçün burada zərrə qədər əsas yoxdur, çünki bir neçə min hektar otlaq sahəsinin qanuni sahiblərdən alınıb qondarma və naməlum "MMC"-yə verilməsi və bu "MMC"-nin nə vaxtsa haradasa kimlər üçünsə gəlir gətirəcəyi iddiası bu xəbis tədbirin gerçəkləşməsi müqabilində dövlətimizə və xalqımıza labüd dəyəcək ağır ziyan müqabilində qara qəpik qədər dəyərsizdir.
3.Cənab hakim, mən ümid eirəm ki, məhkəmə mühakiməsi əsnasında qanun və milli mənafe meyarları zəfər çalacaq və cənab Musa Şəkiliyevin yırtıcı və anlaqsız tədbirlərindən şikayət edən fermerlərin iddia ərizəsi tam təmin ediləcək.
Fəqət məhkəmələrin gerçək vəziyyətini bildiyimdən sizə məlumat verməyi özümə borc bilirəm ki, fermerlərin qanuni hüquqları məhkəmədə müdafiə edilməzsə, iş Avropa İnsan Hüquqları məhkəməsinə çatmamış bu aşkar ədalətsizlik barədə məlumat Azərbaycan rəhbərliyinə, Avropanın bütün ictimaiyyətinə, ilk növbədə milli azlıqların hüquqlarının müdafiəsi ilə məşğul olan, ATƏT, Avropa Şurası və Avropa Birliyinin müvafiq qurumlarına çatdırılacaq.
Şübhə etməyin ki, düşmən dövlətin müvafiq təşkilatları cənab Musa Şəkiliyevin bu səxavətli hədiyyəsindən necə ki, lazımdır, istifadə edəcək. Bu zaman "kimdir müqəssir" sualının cavabı dərhal tapılacaq.
Sizə xoş işlərinizdə uğur diləyirəm,
Hörmətlə,
Arzu Abdullayeva,
Helsinki Vətəndaş Assambleyasının Azərbaycan Milli Komitəsinin sədri,
Olof Palme adına Beynəlxalq Sülh mükafatı,
ABŞ və Avropa Birliyinin Marşall mükafatı,
Niderland Helsinki Komitəsinin mükafatı laureatı
Söz istəyirəm
-
Gəncə şəhərində ünvanlı sosial yardımın təyinatı ilə bağlı yubanmalar yarandığı deyilir. Gəncə şəhərində yaşayan Hacıyev Vüqar Turana bildirib ki, artıq bir aydan çoxdur ki, ünvanlı dövət sosial yardım üçün Dövlət Sosial Müdafiə Fondunun Gəncə vahid əlaqələndirmə mərkəzinə müraciət etsə də, ona nə müsbət cavab, nə də imtina cavabı verilmir: "Əlaqəndirmə mərkəzinə zəng vurub soruşanda deyirlər ki, VEMTAS sistemi işləmir deyə, müraciətlərə baxılması və cavabların verilməsi mümkün deyil. Bir aydan çoxdur ki, Gəncədən müraciət edən adamlar konkret cavab ala bilmir".
-
Çin hökümətinin başlatdığı Bir yol, bir kəmər layihəsi Çinin müasir tarixinin əsas uğuruna çevrilib. Çin Xalq Respublikasının təşəbbüskarı olan layihəyə tərəfdaş ölkələrdəki fəaliyyəti yalnız ikitərəfli iqtisadi yüksəlişlə məhdudlaşmır, həmçinin Bir yol, bir kəmər-ə üzv olan dövlətlərdə Çinin xarici siyaəstinə dəstəkdir. Əlavə olaraq layihədə üzvlüyü olan ölkələr Çin üçün mühüm təbii resurs mənbəyidir. Azərbaycan da Çinin rəhbərlik etdiyi Bir yol, bir kəmər layihəsinin iştirakçılarından biri olaraq ikitərəfli münasibətlərin tərəqqisində mühüm rol oynayır. Belə ki, Rusiya-Ukrayna müharibəsinin başlanması ilə Rusiya ərazisinin Qərbə çıxışının bağlanmasından sonra Trans-Xəzər Beynəlxalq Nəqliyyat yolu Azərbaycanı əsas ticarət marşurut xətti edib. Həmçinin yaranan şərait qeyri-neft sektorun artırmaq və İkinci Qarabağ Müharibəsindən sonra xarici investisiyanın ölkəyə axınını planlaşdıran Azərbaycan üçün xeyirli nəticələnə bilər. Lakin, Çinlə münasibətlərdəki yalnış siyasət bir çox mənfi təsirlər də vəd edir.
-
İki il əvvəl Biləsuvar Rayon İcra Hakimiyyətinin və Əmək və Əhalinin Sosial Müdafiəsi Nazirliyinin nümayəndələri Birinci Qarabağ müharibəsinin qəhrəmanı, şəhid Şaiq Kəlbiyevin evinə gəliblər və hakimiyyətin bu ailə üçün yeni ev tikmək niyyətində olduğunu bildiriblər.
-
Dəyərli media mənsublarını, peşəkar və vicdanlı jurnalistləri məhbəsdən salamlayıram.
Rəy yaz