Yunusların qızı Fransa prezidetinə müraciət edib

Fransa, Azərbaycan və Ermənistan prezidentlərinin Paris görüşü ərəfəsində həbs edilmiş hüquq müdafiəçiləri Leyla və Arif Yunusun qızı Dinara Fransua Ollanda açıq məktub göndərib. O, məktubunda Fransa prezidentindən valideynlərinin azad edilməsinə yardım etməyə çağırıb.

Dinara müraciətində xatırladır ki, bu ilin may ayında Olland Bakıya səfəri zamanı onun anası – Fransanın Fəxli Legion Ordeni kavaleri ilə görüşüb və onun insan hüquqlarının müdafiəsi sahəsində xidmətlərini təqdir edib.

“Təəssüf ki, sizin təqdiriniz Azərbaycan hakimiyyəti üçün heç bir məna kəsb etməyib və bu ilin yayında anam absurd ittihamlarla həbs edilib, onu Bakıda 1 saylı istintaq təcridxanasına göndəriblər”, deyə Dinara Yunus yazır.

Leyla Yunus “istintaq təcridxanasında qeyri-insani rəftara” məruz qalır. “Həbsxana əməkdaşının anama amansızca hücum etməsi böyük narahatlıq doğurur. O, anamın başına yumruq vurub, saçından tutub çəkib, ona əziyyət edib, korluq riskinə məruz qoyub.

Anam gözündən iki dəfə ciddi əməliyyat olunub, hər iki gözündə implant var... Fransa belə bir ədalətsizliyə göz yuma bilərmi?”, deyə Dinara daha sonra qeyd edir.

O, Ollanddan İlham Əliyevdən onun valideynlərini Avropa Parlamentinin bu yaxınlarda qəbul edilmiş qətnaməsində qeyd edildiyi kimi, dərhal və qeyd-şərtsiz azad etməyi tələb etməsini xahiş edir.

“Valideynlərimin Sizin böyük dəstəyinizə bu gün ehtiyacı var, çünki sabah gec ola bilər”, deyə Dinara Yunus məktubuna yekun vurur. -06D-