Ekspert: ASALA Azərbaycan diplomatik nümayəndəliklərində terror törədə bilməz

“ASALA” erməni terror təşkilatı xaricdəki Azərbaycan diplomatik nümayəndəliklərində terror törətmək və diplomatları öldürməklə bağlı hədələrini yerinə yetirə bilməz. Çünki Azərbaycanın təhlükəsizlik qüvvələrinin hər-hansı terror aktına qarşı qabaqlayıcı tədbirlər həyata keçirmək bacarığı və terrora qarşı mübarizə ilə bağlı yetərli qədər beynəlxalq tərəfdaşları var. Bu barədə “Terrorizmlə İctimai Mübarizə” Birliyinin rəhbəri, ehtiyatda olan polkovnik-leytenant Şahmurad Məmmədov Obyektiv.tv-yə müsahibəsində bildirib. 

Onun fikrincə, Ermənistan rəhbərlərinin Azərbaycan ordusunun zabiti Ramil Səfərovun əfvindən sonrakı hədələyici bəyanatları ilə ASALA-nın hədələyici məktubu bir-birinin tamamlayır. “Bu baxımdan Ermənistan dövlətinin ASALA-ya siyasi, texniki, təchizat, informasiya və maliyyə yardımı edəcəyi real görünür”. 

Ekspert eyni zamanda hesab edir ki, Ermənistanla onun müttəfiqi Rusiyanın iqtisadi-siyasi maraqları fərqli olduğundan Rusiya kəşfiyyatının terror siyasətində Ermənistana və bu dövlətin himayə etdiyi terror təşkilatlarına yardım edəcəyi ilə bağlı səslənən fikirlər reallığı əks etdirmir. “Ermənistanın yeganə strateji müttəfiqi Rusiyanın Azərbaycanda və Türkiyədə böyük iqtisadi maraqları var. Digər tərəfdən Ermənistana müttəfiqlik edən İranın xarici maraqları kəskin fərqlənir”. 

Polkovnik-leytenant eyni zamanda Azərbaycan vətəndaşlarını ölkənin təhlükəsizliyi ilə bağlı ayıq olmağa səsləyib. “İstər xaricdə, istərsə də daxildə ölkənin təhlükəsizliyini qorumaq yalnız dövlətin deyil, bütün vətəndaşların müqəddəs vəzifəsidir. Təhlükəsizliklə bağlı ictimai müdafiə sisteminin yaradılmasının vaxtı çatıb”.

O, eyni zamanda diqqəti Neft Akademiyasında tələbələrin güllələnməsinə, Sərhəd Qoşunlarının hərbi hissəsində yanğın hadisəsinə və Quba hadisələrinə yönəldib. “Bu hadisələr bir məşq və xəbərdarlıdır”, - deyə o qeyd edib. -03B-