İlqar Məmmədov: Orta təbəqəyə istinad edirik

Azərbaycanın 20 illik müstəqilliyi ərzində prezident seçkiləri zamanı ən etibarlı seçici olan orta sinif formalaşıb, bu barədə obyektiv.tv-yə müsahibəsində REAL ictimai-siyasi hərəkatının sədri İlqar Məmmədov bildirib.

Siyasətçinin sözlərinə görə, bu müddət ərzində aparıcı müxalifət partiyaları yanlış olaraq yalnız işi, başqa gəlir mənbələri olmayan etirazçı elektorata istinad edir. Bu, səmərəsiz yanaşmadır

Məmur aparatı, güc qurumları, biznes, o cümlədən şəxsi biznes, televiziya və İnternet istisna olmaqla, əksər KİV-lər İlham Əliyevin “monarxiya” komandasının nəzarəti altındadır. Çətinliklə fəaliyyətini davam etdirən müstəqil KİV və çap nəşriyyatlarına isə daim təzyiq göstərilir.

Lakin ölkədə sahibkarlıq qurumlarının on minlərcə işçisi, mühəndislər, həkimlər, müəllimlər siyasi hakimiyyətdən asılı deyillər. Bu təbəqə nə mövcud rejimi, nə obyektiv olaraq hazırki siyasi hakimiyyətin uzunmüddətliliyi üçün işləyən sistemli müxalifəti qəbul etməyəcək. 

Bu təbəqə sabit əmək haqqı ilə təmin edilib, lakin övladlarının gələcəyindən narahatdır və 5-10 il əvvəl olduğu qədər siyasətə laqeyd deyil. Bu insanların sayı ildən ilə artır və yaxın gələcəkdə prezidentliyə real namizəd məhz onlara istinad edəcək, siyasətçi belə hesab edir.

Gələn il prezident seçkilərində dörd il əvvəl olduğundan daha dinamik mübarizə müşahidə olunacaq, buna görə hazırki dövlət başçısına gerçək alternativ irəli sürə biləcək İctimai Palata indidən bütün müxalifət qüvvələrinin etibarını qazanmalıdır.

Təkcə siyasi platforma deyil, əsas dövlət və hökumət vəzifələrinə konkret namizədlər də üstün cəhətləri göstərilməklə ictimaiyyətin mühakiməsinə verilməlidir. Bu gündən hakimiyyətdən narazılığın səbəblərini deyil, cəmiyyətdə demokratik dəyişikliklərə şərait yaradan konkret addımları seçicilərin nəzərinə çatdırmaq lazımdır. Ümumilikdə siyasi sistem dəyişdirilməlidir. O, qeyri-mükəmməl və perspektivsizdir.

REAL ictimai-siyasi hərəkatı dəqiq islahat planını baxılması üçün İctimai Palataya təqdim edib. “Biz öz xülasələrimiz və qeydlərimizlə ona kömək etmək istəyirik, lakin “heç kimin təsiri altında” olmaq niyyətində deyilik. Seçkilərdən əvvəl təcrübi və proqram fəaliyyətlərinin nə dərəcədə uyğun olmasına əsasən taktiki addımlarımızı müəyyən edəcəyik. Nəzərəçarpan uyğunsuzluq görsək, prezidentliyə öz namizədimizi irəli sürəcəyik”, deyə Məmmədov çıxışını yekunlaşdırıb. -17D-