Rasim Əliyevin atası oğlunun ölümündə günahkar olanların cəzalandırılmasını tələb edir

İstintaq döyülərək öldürülən jurnalist Rasim Əliyevin ailəsinə ətraflı məlumat vermir. Bu barədə R.Əliyevin atası Turan agentliyi və “Amerikanın səsi” radiosuna müsahibəsində bildirib.

İki gün öncə o, Bakı prokurorluğunda olub, lakin istintaqın gedişi barədə hər hansı  məlumat ala bilməyib. Yalnız  bir daha bildiriblər ki, istintaq Cinayət Məcəlləsinin 126 –cı maddəsi (qəsdən sağlamlığa ağır zərər vurma) üzrə aparılır.

M.Əliyev cinayətin təşkilatçılarının və icraçılarının cəzalandırılmasını, həmçinin onun oğlu xəstəxanaya daxil olandan ölənə qədər olan müddətdə həkimlərin hərəkətlərinin araşdırılmasını tələb edib. Onun sözlərinə görə, hələlik həkimlərdən heç kim məsuliyyətə cəlb edilməyib. Həkimlərdən yalnız ifadə alıblar, sonra da buraxıblar.

M.Əliyevə bildirilib ki, Səhiyyə Nazirliyinin prokurorluğun sorğusuna cavabından sonra  komissiya yaradılacaq və  komissiya xəstəxanadakı həkimlərin həmin müddətdə olan fəaliyyətini araşdıracaq.

“Ailənizə barışıqla bağlı təkliflər olub?” sualına ata mənfi cavab verib. Lakin üçüncü şəxs tərəfdən barışıq təklifi gəlib. Ancaq jurnalistin ailəsi oğullarını öldürən insanlarla barışmaq niyyətində deyil.

M.Əliyev bu cinayəti geniş işıqlandırdığına görə müstəqil mətbuata təşəkkürünü bildirib.

“Çox saq olsun  prezident  İlham Əliyev bu işi şəxsi nəzarətinə götürdü. Bunu yüksək qiymətləndirirəm. Onun bu məsələni şəxsi nəzarətə götürməsi sayəsində günahkarlar tutuldular”, - M.Əliyev vurğulayıb.

Eyni zamanda mərhumun atası iş üzrə həbs edilən futbolçu Cavid Hüseynovun azadlığa buraxılması üçün bir qrup şəxsin prezidentə müraciətini pisləyib.

O qeyd edib ki, KİV vasitəsilə bir daha prezident İlham Əliyevdən  xahiş edir ki, bu məsələni bundan sonra da nəzarətdə saxlasın, cinayətkar dəstənin layiqli cəzasını alması üçün əlindən gələni eləsin.

O həmçinin prokurorluq orqanlarını cinayət işini düzgün və obyektiv araşdırmağa, cinayətkarların layiqli cəzasını almasına nail olmağa çağırıb—1606D-