Rusiya həm Ermənistanı, həm də Azərbaycanı qarmaqda saxlayır H. Hacızadə

Bakı/16.05.18/Turan: Azərbaycanın Rusiyadakı keçmiş səfiri Hikmət Hacızadə "Amerikanın səsi"nə müsahibəsində Ermənistan-Rusiya münasibətləri və Dağlıq Qarabağ münaqişəsindən danışıb.

Sual: Ermənistanın yeni baş naziri ilk səfərini Rusiyaya etdi. Rusiya-Ermənistan münasibətlərinin perspektivləri necə görünür?

Cavab: Çətin sualdır. Hələ ki Nikol Paşinyan yenidir və fəaliyyətinə ziddiyyətli çıxışlarla başlayıb. O, müxalifətdə olanda deyirdi ki, Rusiya ilə münasibətlərə yenidən baxılmalı. Deyirdi ki, lazım olanda Rusiya Ermənistanı qabağa çəkir, lazım olanda satır, lazım olanda elə-belə, oyuncaq kimi davranır. Xüsusilə, onun fikirləri daha çox aprel müharibəsindən (2016-ci il aprelin 2-dən 5-dək Dağlıq Qarabağda hərbi əməliyyatların bərpası nəzərdə tutulur-red.) sonra yayıldı. Deyirdi, "yenə ruslar satdı, azərbaycanlılar gəldi bizi qırdı, rus tərpənmədi" və s. Bununla bağlı Paşinyan bir neçə dəfə fikir səsləndirdi ki, Rusiya ilə münasibətlərə yenidən baxmalıyıq. Ancaq Paşinyan hakimiyyətə gəlməyə yaxınlaşanda, onun fəaliyyəti geniş vüsət alanda, böyük hərəkat başlayanda, hərəkat bundan tələb etməyə başladı ki, xeyr, Rusiya bizə lazımdır, Rusiya bizə vacibdir. Xahiş edirik, Rusiyanın xətrinə dəyməyin və o, geri çəkildi. Başladı ki, "hə, yox mən elə deməmişəm, mən başqa cür demişəm. Rusiya bizim can-ciyərimizdir, həmişə bir olacağıq. Bəzi məsələləri yenidən danışacağıq. Amma ümumən, biz onun hərbi, ticari ittifaqlarında fəal iştirak edəcəyik". Bax belə, qalıb bu iki fikrin arasında. Burada Qərb məsələsi də var. O, Qərblə münasibətlərini necə quracaq? Əvvəl-əvvəl Paşinyanı qərbpərəst kimi tanıyırdılar. Xüsusilə də deyirdilər ki, o Fransa diasporunun təsiri altındadır. O, Qərblə bütün əməkdaşlığın genişləndirilməsinin tərəfdarıdır. Avropa İttifaqı ilə əməkdaşlıq sazişinin genişləndirilməsinin tərəfdarı kimi tanınırdı. İndi isə Ermənistanın ruspərəstləri onu sıxırlar. Baxaq görək, o, dözə biləcək, ya yox. Amma hər halda ürəyində qərbpərəstdir.

Sual: Nikol Paşinyanın Moskva səfəri zamanı Dağlıq Qarabağ münaqişəsinin nizamlanması ilə bağlı hər hansı açıqlama verilməyib. Münaqişənin bundan sonrakı nizamlanma prosesində bir yenilik ola bilərmi?

Cavab: Yenilik gözləmirəm. Həmin vəziyyət olacaq, yəni, Rusiyanın mövqeyi belədir ki, status-kvo necə var, elə də qalacaq. Rusiya həm Ermənistanı, həm də Azərbaycanı qarmaqda saxlamaq istəyir. Buna görə də indiki vəziyyət Rusiyaya sərf edir. Kim Rusiyanın xoşuna gəlməyən addımlar atsa, o saat onu cərimələyirlər. Ya Azərbaycanı Ermənitsanın üzərinə buraxırlar, ya da Ermənistanı Azərbaycanın üzərinə buraxırlar. Status-kvo belə qalacaq, çünki Rusiya belə istəyir.

Sual: Azərbaycanın xarici işlər naziri mayın 15-də ATƏT-in Minsk Qrupunun həmsədrləri ilə münaqişə ətrafında yaranmış son durumu müzakirə edib. Münaqişənin nizamlanmasında ATƏT-in Minsk Qrupunun həmsədrlərinin mövqeyində hansı yeniliklər ola bilər?

Cavab: Heç bir yenilik gözləmək olmaz. Ümumən, bu, Minsk Qrupu mənasız bir qurumdur. Qarabağ probleminin bütün açarları Moskvadadır. Moskvaya fikir verin. Məsələni izləyirsinizsə, baxın, görün Moskva necə davranır, nə deyir, hansı eyhamlar edir. Qalanlarının Azərbaycanla heç bir işi, marağı yoxdur. Nə Fransanın, nə Amerikanın. Əfsus ki, belədir. Başları qarışıb Suriya, Ukrayna, indi də İran, Fələstin problemlərinə. Hələ ki Azərbaycana çox da maraq yoxdur.

Sual: Azərbaycan indiki vəziyyətdə hansı addımları atmalıdır? Xüsusilə, xarici siyasət sahəsində hansı addımlar atmalıdır?

Cavab: Mən belə deyə bilərəm ki, bizi başqa bir təhlükə gözləyir. Ola bilsin, Ermənistan demokratikləşəcək, indi Paşinyanın planları belədir. Amma Azərbaycan bu yolda heç bir addım atmır. Bu, bizim zərərimizədir. Onda dünya ictimaiyyətinin gözündə demokratik Ermənistan, antidemokratik Azərbaycanla toqquşur. Əlbəttə, bütün simpatiyalar Ermənistanın tərəfində olacaq. Bunu düşünmək lazımdır. Bizim antidemokatikliyimiz, avtoritarizmimiz bizim zəifliyimizdir. İslahatlar lazımdır. Geniş siyasi islahatlar. Siyasi məhbuslar buraxılmalıdır. Söz azadlığı təmin olunmalıdır. Beynəlxalq təşkilatlar Azərbaycana qayıtmalıdır. Biz bunu etməsək, Ermənistan etsə, bu, artıq bizim üçün minusdur.-0--