Türkiyəli millət vəkili: “Ölkəni “Z” nəsli dəyişdirəcək”

***

Turan: Türkiyənin təcrübəli siyasətçilərindən  biri və ana müxalifət partiyasının millət vəkili olaraq cəmiyyətdəki təsir sahənizi gördüyünüz hansı məzmunlu işlərlə artırmağa çalışırsınız? 

Tekin: Epidemiya şəraitində yaşayırıq. Bu şəraitin əl verdiyi müddətdə bütün sahələrdə xalqımızla olub onların səsini dinləyirəm. Hər gün cəmiyyətin müxtəlif təbəqələrindən olan insanlarla görüşür, onların tələblərini, istəklərini öyrənir, problemlərini diqqətlə araşdırıram. Sonra isə bu problemləri həm Türkiyə Böyük Millət Məclisində gündəmə gətirir, həm də mətbuat və TV kanalları vasitəsilə ictimaiyyətlə bölüşür, qanun təklifləri hazırlayıram. Mən siyasətin xalqın içində həyata keçirilməsinə inanan insanam. Bağlı qapılar arxasında siyasət həyata keçirmək olmaz. Bu prinsipimə həmişə riayət etməyə çalışıram.

Turan: İyulun axırında topladığınız  qurultayda Türkiyədə yeni bir inqilab həyata keçirməyi qarşıya məqsəd qoydunuz. Bu iddianızı reallaşdırmaq üçün gördüyünüz işlərlə bağlı nə demək istərdiniz?

Tekin: Bizim müəyyənləşdirdiyimiz hədəflər çox mühümdür. Bu hədəflərə çatmaq üçün lazım olan praktik addımları daha təsirli şəkildə  atmaq məcburiyyətindəyik. “Halva-halva” deməklə ağız şirin olmur. İqtidara gələ bilmək üçün görməyimiz lazım olan işlər məlumdur. Hər səviyyədə daha çox çalışmaq məcburiyyətindəyik. Bunu da qeyd etməliyəm ki, cəmiyyətimizin hökumətə qarşı mövqeyində də artıq  qətiləşmə görünür. AKP artıq millətlə bağlarını itirib. Hər sahədə yaşanan ciddi problemlər açıq-aşkardır. Xalqımız siyasi iqtidarın dəyişməsini istəyir. 31 mart 2019-cu ildə başlayan dəyişiklik prosesi bundan sonrakı ilk seçkidə tam şəkildə reallaşacaq.

Turan: Siz daim cəmiyyətin içində olub xalqın nəbzini tutan bir siyasətçisiniz. Cəmiyyətin  siyasətdən ən ümdə gözləntisi nədir?

Tekin: Diqqət yetirin, Türkiyədə təxminən 10 milyon işsiz var. 15 milyon 500 min vətəndaşımız evini qızdıra bilmir. Ona görə də cəmiyyət artıq rahatlıq istəyir, rifah istəyir, inkişaf istəyir. Millət siyasətçidən evinə apardığı çörəyin böyük olmasını istəyir. Buna nail olmaq üçün öz üstümüzə düşən vəzifələri yerinə yetirmək məcburiyyətindəyik. 1980-ci illərin siyasi partiya modeliylə XXİ əsrin problemlərin həll edə bilmərik. Mən daha plüralist, üfüqi ierarxiyaya imkan verən, dinamik və enerjili bir partiya strukturu təklif edirəm.

Turan: Öz rəhbərliyinizlə keçirilən ictimai rəy sorğusunda Türkiyədəki 18-29 yaş arasındakı gənclərin heç bir partiyaya  etimad etmədiyi müəyyənləşdi. Siz mənsubu olduğunuz partiyaya belə xəbərdarlıq edərək millət vəkili seçilmək üçün qaydaların dəyişdirilməsini tələb etdiniz. O araşdırmanız barədə agentliyimizə nə demək istərdiniz?

Tekin: “Z” nəsli çox müzakirə edilir. Növbəti seçkidə 7 milyon seçici ilk dəfə səs verəcək. Ölkəmizdəki seçicilərin 20%-i “Z” nəslindəndir. Onları başa düşməsəniz, seçkidə qalib gəlməyiniz mümkün deyil. Biz bu çərçivədə bir araşdırma apardıq. Meydana çox mühüm nəticə çıxdı. Gənclər AKP-yə arxa çevirib ancaq müxalifət partiyalarına da  yaxınlaşmırlar. Gəncləri öz tərəfimizə çəkməyin yolu daha müasir şəkildə təşkilatlanmaqdan, dinamik  siyasət tərzindən keçir. Ona görə də təkcə öz partiyama yox, bütün müxalifət partiyalarına xəbərdarlıq edirəm. “Z” nəsli bu və ya digər şəkildə ölkəni dəyişdirəcək. Bu dəyişikliyin tərəfində yer almaq və ona liderlik etmək üçün atılması lazım olan addımlar var.

Turan: İqtidar partiyası son 6 ildə həmişə vaxtından əvvəl seçki keçirib. Növbəti erkən seçkini gözləyirsinizmi və partiyanız buna hazırdırmı?

Tekin: Siyasi partiyalar seçkidə iştirak etmək üçün yaradılır. Biz həmişə seçkiyə hazırıq. Türkiyədə məndən başqa erkən seçki tələb edən siyasətçi də, deyəsən, yoxdur. Biz bu şəraitdə erkən seçki gözləmirik. 2022-ci ildə erkən seçki məsələsi gündəmə gələcək. İqtidar o vaxtkı vəziyyətə baxıb qərar qəbul edəcək. Biz də gücümüzün hamısını sərf edərək işlərimizə davam edirik. Fürsətdən istifadə edərək agentliyiniz vasitəsilə azərbaycanlı bacı-qardaşlarıma, Azərbaycan xalqına sevgilərimi göndərirəm. Ən səmimi duyğularımla hamıya cansağlığı, xoşbəxtlik və rifah diləyirəm.