Xankəndidəki ermənilər nəyə etiraz edir? – Elxan Mehdiyev

Bakı/23.06.21/Turan:  Ermənistanda iyunun 20-də keçirilmiş növbədənkənar parlament seçkiləri günü  “Vətəndaş razılaşması” partiyasının rəhbəri Nikol Paşinyanın qərargahında olan və seçki nəticələrindən sonra Paşinyanı qələbə münasibəti ilə təbrik edən separatçı rejimin başçısı  Araik Arutyunyan Xankəndidə etirazla qarşılaşıb.  Ötən gün  ermənilər Xankəndinin mərkəzinə toplaşaraq özünü separatçı rejimin prezidenti adlandıran Araik Arutyunyanın istefasını tələb ediblər.

Toplaşanlar Arutyunyanın siyasətindən razı olmadıqlarını və onun erməni xalqının maraqlarını müdafiə etmədiyini bildiriblər. Etirazçılar aksiya zamanı Arutyunyanın ünvanına “Xain”, “Get!” şüarları səsləndiriblər.

Xankəndidə mitinqçilər qarşısında çıxış edən raik Arutyunyan seçki günü “Müki Müdafiə” Partiyasının qərargahına nə üçün getdiyini açıqlayıb. Qondarma rejimin başçısı Ermənistanın lideri ilə yaxşı münasibət qurmağa məcbur olduğunu vurğulayıb.

O, son zamanlarda Ermənistan və separatçılar arasındakı münasibətlərin spekulyasiyalara səbəb olduğuna dilə gətirib: “Ermənistanla qarşılıqlı əlaqə olmadan 35 min vətəndaşın sosial problemlərinin həllinin mümkün ola biləcəyini düşünürsünüz?”- Arutyunyan belə deyib.

Ermənistanda xalq Paşinyanı və onun siyasətini dəstəklədi. Bu həm də o anlama gələ bilər ki, erməni xalqı artıq reallıqları qəbul edir və Qarabağın onlar üçün “başağrısı” olduğunu anlayır. Erməni xalqı həm də onu anlamağa başlayıb ki, regionda qonşuları olan Azərbaycan və Türkiyə ilə normal münasibətlər Ermənistan üçün perspektivli gələcək vəd edir. Amma görünən odur ki, Qarabağda yaşayan ermənilər bu reallıqları qəbul etmək istəmir. Ya da bu etirazın arxasında başqa qüvvələr və məqsədlər dayanır.

Baş verənlərlə bağlı konfliktoloq Elxan Mehdiyev  Kamran Mahmudovun təqdimatında yayımlanan “Çətin sual” verilişində danışıb.–0—