Yenə də aqressiya və sahilin işğalı..

Bakı/26.05.23/Turan: Mayın 24-dən 25-nə keçən gecə Buzovna qəsəbəsi ərazisindəki "Zaqulba" ictimai çimərliyində elektrik qaynağı işıq saçıb, çəkiclər qayalarda dəliklər açıb, işçilər oraya beton tökərək metal borular qoymağa başlayıblar. Yerli sakinin “nə baş verir və niyə qanunsuz hərəkətlər gecə törədilir” sualına işçilər cavab verə bilməyiblər. İşçilərlə yerli sakinlər arasında gecə dialoqunun videosu sosial şəbəkədə yerləşdirilib. İşlər Azərbaycan prezidentinin iqamətgahının pəncərələrindən yaxşı görünən "Mirvari" restoranının sağ tərəfindəki çimərlikdə aparılır. 2022-ci ilin yayında Buzovna qəsəbəsi ictimaiyyəti KİV-lərdə və sosial şəbəkələrdə, TV-də ölkə prezidentinə müraciət edərək qayalardan dənizə qədər uzanan özbaşına hasarların Xəzər Rayon İcra Hakimiyəti qüvvələrinin səylərilə sökülməsinə nail olub. Lakin bu işlər rayon İcra Hakimiyyəti tərəfindən sonadək tamamlanmadığından qayalar çirkin konstruksiyalardan təmizlənməyib. Buzovna qəsəbəsinin sakinləri qaya massivini mühafizə zonası elan etmək xahişilə müxtəlif qurumlara müraciət ediblər. Lakin vətəndaşların təşəbbüsü cavabsız qalıb. Tezliklə 2023-cü ilin çimərlik mövsümü açılır və sahildə, başqa yerlərdə yeni hasarlar peyda olub, - yerli fəal Seyfulla Azər öz fikirlərini Turan ilə bölüşüb.

Təxminən 1 hektara yaxın ərazi hasarlanıb, girişdə böyük hərflərlə Dalga Buzovna yazısı olan darvaza quraşdırılıb. Ötən ildən torpaq, mebel gətirilib, digər işlər görülüb, dəniz suyundan qayalara qədər hasarları isə indi quraşdırmağa başlayıblar, yay mövsümü başlayana  qədər qapalı ödənişli çimərlik tikməyə tələsirlər, - digər fəal Elbəy Əlizadə Turan-a bildirib.

Ötən il Seyfulla Azər və Elbəy Əlizadə Buzovna sahillərini məişət və tikinti tullantılarından təmizləmək üçün bir neçə ictimai iməcilik təşkil ediblər. Onlar fotoları paylaşıblar,  unikal gözəlliyə malik, minillik boyunca suyun və küləyin gücüylə inanılmaz formalara düşən qaya massivlərinin işğalçılardan azad edilməsinin sevincindən danışıblar. Bu qayalarda Müslüm Maqomayevin məşhur "Mavi dəniz" mahnısına klip, bədii filmlərin kadrları çəkilib, bura sevgililərin görüş yeri olub. Ancaq sonra, son illərdə Xəzər rayonunda özbaşınalıq səbəbindən qayalardan tutmuş suyun kənarına qədər sahil bağ massivlərinin sahibləri tərəfindən tutulub. Ötən il ictimaiyyət 20-50 metr enində sahil zolağından istifadənin sərbəstliyi haqqında prezident İlham Əliyevin 2015 və 2016-cı illər fərmanlarının icrasına nail olub. Sahilin azad edilməsi təkcə Buzovna çimərliyində baş verib. Restoran sahiblərinə mane olduğu üçün qayaların mişarlandığı  bəzi yerlərdə əvvəlki təbii landşaftı bərpa etmək mümkün olmayıb. Lakin yerli hakimiyyətin qanuna tabe olması uzun sürməyib. Düz bir il keçib və yenidən hasarlar...

Azərbaycan Ekologiya və Təbii Sərvətlər Nazirliyində sahil zolağının zəbt edilməsilə bağlı məlumatımıza təəccübləndilər. Əvvəlcə dedilər ki, ərazi məsələlərilə məşğul olmurlar, amma biz izah edəndə ki, söhbət təbii landşaftın pozulmasından, qaya massivində flora və faunanın təhlükəsizliyindən gedir, nazirlik yoxlama üçün əməkdaşları ora göndərmək niyyətində olduğunu bildirdi.

Xəzər İcra Hakimiyyətindən Turan-a bildirdilər ki, Buzovna qəsəbəsində bütün məsələlərlə qəsəbə nümayəndəliyi məşğul olur. Rayon İcra Hakimiyyətinin Buzovnadakı nümayəndəliyinin rəhbəri Emin Əliyev əvvəlcə telefonun dəstəyini götürdü, amma gecə işləri barədə sualımızı eşidəndə dedi ki, müşavirədədir. Sonra gün ərzində E. Əliyev Turan-ın zənglərinə cavab verməyib. Yəqin  telefon nömrəsilə müəyyən ediblər ki, zəng edən jurnalistlərdir və onun tabeliyində olan ərazidə hasarların hansı əsaslarla tikildiyini və bu tikintinin prezidentin fərmanları ilə necə uzlaşdığını soruşurlar.

Biz sahildə baş verənlərə aydınlıq gətirilməsi xahişilə E.Əliyevə audiomesaj göndərdik. Niyə tikinti gecə aparılır və hansı hüquqi əsaslarla aparılır? İstirahət edənlərin dənizə getmək imkanları olmayacaqmı?

Şirkətlər çimərlik zonasını əldə edə (ala) bilməzlər, çünki "Torpaq icarəsi haqqında" qanunun beşinci bəndinə əsasən, Xəzər dənizinin sahil zonası, o cümlədən əhalinin müalicəsi və istirahəti üçün nəzərdə tutulan sahələr dövlətin hesab olunur. Güman etmək olar ki,  Buzovna qəsəbəsində dəniz sahilinin bir hissəsini Dalga Beach şirkəti yerli İcra Hakimiyyətindən icarəyə alıb. Bu ad hasarlanmış ərazinin darvazasında oxunur. Turan Dalga Beach şirkətilə əlaqə yaratmağa çalışıb, lakin şirkətin saytında göstərilən telefonlar cavab vermir.

S.Azərin fikrincə, sahildə tələsik ödənişli çimərlik tikilir. O, iş adamının vətəndaşlara abadlaşdırılmış sahildə istirahət (ödənişli xidmətlər və rahatlıq) təklif edərək pul qazanmasının əleyhinə deyil. "Ancaq ölkə prezidentinin fərmanını pozmaq, vətəndaşların dənizə girişini bağlamaq, hasarlar ucaltmaq və mövsümi qazanc üçün qayalara ziyan vurmaq yolverilməzdir", - o deyib.

Turan agentliyi Ekologiya və Təbii Sərvətlər Nazirliyi, Xəzər Rayon İcra Hakimiyyətinin Buzovna sahil zonasında tikinti işlərinə nəzarət və əhalinin sərbəst istirahət hüququnun müdafiəsi üzrə əməli tədbirlər həyata keçirməsini gözləyir.