Azərbaycan kapitalı Türkiyə sahillərində..

Türkiyə Baş Kadastr İdarəsi əcnəbilərə satılan daşınmaz əmlakla bağlı məlumatları açıqlayıb. Məlum olub ki, bu ilin yanvar-fevral aylarında Azərbaycan vətəndaşları bu ölkədə 130-a yaxın daşınmaz əmlak (kommersiya obyektlərini saymasaq) alıblar. Ötən ilin analoji dövrü ilə müqayisədə yaşayış yerlərinin satışı 10% artıb.

Anadolu İnformasiya Agentliyinin məlumatına görə, 2017-ci ildə əcnəbilər Türkiyədə 4,6 mlrd. dollar məbləğində daşınmaz əmlak alıblar ki, bu da 2016-cı ilin göstəricisindən 19,4% çoxdur.

Azərbaycan vətəndaşları Türkiyədə 942 daşınmaz obyekt alıblar. Böyük Britaniya - 794, Almaniya - 772, İran - 792, Misir - 587. Türkiyədə 7311 obyekt başqa ölkələrin vətəndaşları tərəfindən alınıb. Yəni, satışa çıxarılan hər 24-cü daşınmaz obyekt azərbaycanlı tərəfindən alınıb.

Müvafiq olaraq, Azərbaycan vətəndaşlarının Türkiyədə daşınmaz əmlaka yatırdığı investisiyanın həcmi orta hesabla 191 mln. dollardan çoxdur. Sözügedən həcmdə maliyyə ölkədən çıxarılaraq Türkiyənin daşınmaz əmlak bazarına yatırılıb.

Milli bank sistemi, eləcə də əhali üçün şok terapeyası olan manatın devalvasiyası Azərbaycandan kapital axınının güclü katalizatoruna çevrilib.

İmkanlı sahibkarlar, onların ardınca Milli Məclisin "sadə" deputatları və dövlət qulluqçuları təkcəTürkiyədə yox, həm də Şimali Kipr, Çexiya, Yunanıstan, Almaniya, həmçinin Ukraynada daşınmaz əmlak sahibləri olublar.

"New Europe Baku" rieltor şirkətinin direktoru Vəfadar Axundov bildirib ki, əgər sövdələşmənin regional aspektini götürsək, azərbaycanlı investorlar İstanbulda mənzil və ticarət obyekti almağa üstünlük verirlər.

"Bu meqapolisdə mənzili şəhərə səfər edən imkanlı tələbələrin valideynləri və biznesmenlər alır. Başqa sözlə desək, bu yerlər şəxsi istifadə üçün alınır. Ancaq bəzi investorlar üçün daşınmaz əmlak alışı sırf biznesdir: mənzil icarəyə vermək və stabil, yaxşı gəlir əldə etmək üçün alınır", - V.Axundov qeyd edib.

Prioritet regionlar sırasına Bodrum, Antalya, Alanya da daxildir. Alanya Ticarət və Sənaye Obyektləri İdarəsinin rəhbəri Mətin Alatay bildirib ki, azərbaycanlıların bu şəhərdə ev almasına böyük maraq müşahidə olunur. Mənzillərin qiyməti 30 min avrodan başlayır. Bu şəhərdə mənzilin orta qiyməti 56 600 avro təşkil edir. Əsasən 1-2 otaqlı mənzillər alınır. Villaların alqı-satqısı dayandırılıb, bu, qiymətlərlə əlaqədardır.

Azərbaycanlılar kurort zonalarında daşınmaz əmlakı əsasən icarəyə vermək üçün alır. Yeri gəlmişkən, əcnəbiləri Türkiyəyə cəlb edən əsas amillərdən biri xarici daşınmaz əmlak alıcılarının ƏDV ödəməkdən azad edilməsidir.

Lakin son zamanlar qonşu Gürcüstanda da fəallıq artıb. Dövlət Statistika Komitəsi məlumat verir ki, 2012-2016-cı illərdə respublikada əcnəbilərin iştirakı ilə daşınmaz əmlak üzrə 34 mindən çox sövdələşmə bağlanıb. Müsbət tendensiya 2017-ci ildə də davam edib. Gürcüstanda daşınmaz əmlak alanların siyahısında rusiyalı investorlar liderlik edir. Onların ardınca Azərbaycan, Ukrayna və Ermənistan vətəndaşları gəlir. Nəzərə alsaq ki, qonşu ölkədə mənzilin orta qiyməti Azərbaycanda olduğundan elə çox fərqlənmir, belə fikir söyləmək olar ki, bizim orta sahibkarlar Tbilisi, Kutaisi, Batumu və s. yerlərdə mənzil və ya evlərin yeni sahibləridir.

Daşınmaz əmlak üzrə ekspert Rəşad Əliyev oxu.az saytına müsahibəsində bildirib ki, azərbaycanlı investorlar xarici bazarlara bir neçə səbəbdən can atır.

"Türkiyədə evlər qiymətlərin cəlbedici olmasına görə alınır. Türkiyədə mənzil investisiya bazarının perspektivliyi baxımından qiymətlər Azərbaycanda olduğundan daha cəlbedici olub və olaraq da qalır. Digər səbəb isə odur ki, banklarda dollar əmanətləri üzrə faizlər aşağıdır. Adamların çoxu Türkiyədə ona görə ev alır ki, orada işləyir, biznesi var", - ekspert qeyd edib. Qəribə də olsa, Türkiyə lirəsinin qeyri-sabitliyi alıcıların fəallığına təsir göstərməyib.

Yerli daşınmaz əmlak bazarına toxunan ekspert deyib ki, qiymətlər stabildir, ancaq fəallıq aşağıdır. Hazırda bazarda oyunçular əsasən öz mənzil şəraitini yaxşılaşdırır. Adamlar mənzilə investisiya qoymaqda o qədər maraqlı deyil.

Bir sözlə, bu bazarda durğunluqdur. Lakin o amili də nəzərə almaq lazımdır ki, son iki ildə bazarın üstünlükləri və strukturu dəyişib. Üstünlüklərdən danışsaq, son iki ildə alıcılar daha çox yeni tikilən binalara üstünlük verirlər. Buna təsir edən amillərdən biri evlərin söküntüsü ilə bağlı işlərdir. Bazara daha çox pilot layihələr, sosial mənzillər çıxmağa başlayır.