Ali Məhkəmə Rüfət Səfərovun şikayətini təmin etməyib

Bakı/11.07.17/Turan: İyulun 11-də Ali Məhkəmə Zərdab Rayon Prokurorluğunun keçmiş müstəntiqi Rüfət Səfərovun kassasiya şikayətini təmin etməyib. R.Səfərov siyasi bəyanatla vəzifəsindən istefa verdikdən sonra həbs olunub. Prosesə hakim Gülzar Rzayeva sədrlik edib.

Keçmiş müstəntiq parlamentin keçmiş deputatı, hakim Yeni Azərbaycan Partiyasının yaradıcılarından biri Eldar Sabiroğlunun oğludur. E.Sabiroğlu 2015-ci ildə Prezident Administrasiyasının rəhbəri Ramiz Mehdiyevin ünvanına sərt çıxışlar edib. Həmin ilin dekabrında isə Rüfət Səfərov qanunçuluğu pozmasına və hüquq-mühafizə orqanlarının pis işinə görə hakimiyyəti açıq tənqid edib. O, prokurorluq orqanlarından istefa verdiyini bəyan edib.

Öz növbəsində prokurorluq bəyan edib ki, R.Səfərov "prokurorluq işçisinə yaraşmayan hərəkətə" görə işdən çıxarılıb.

2016-cı il yanvarın 15-də R.Səfərov rüşvət almaq ittihamı ilə həbs olunub. Lakin yanvarın 22-də ev dustaqlığına buraxılıb. R.Səfərov ittihamı rədd edib və cinayət işinin sifariş olduğunu bildirib. O, ev dustaqlığı dövründə də əvvəlki fikirlərindən geri çəkilməyib, iqtidarı tənqid edən bəyanatlarını davam etdirib.

Keçmiş müstəntiq Lənkəran Ağır Cinayətlər Məhkəməsinin hökmü ilə 2016-cı ilin sentyabrında 9 il azadlıqdan məhrum olunub. Elə məhkəmə zalında da həbs edilib.

2016-cı il dekabrın 22-də Şirvan Apellyasiya Məhkəməsi R.Səfərovun apellyasiya şikayətini təmin etməyib.

R.Səfərov bugünki məhkəmədə iştirak edib. O, məhkəmə heyətinə etiraz etməyib.

"Məhkəmənin tərkibinə etirazım yoxdur. Məhkəmə tərkibindən asılı olmayaraq İlham Əliyev rejiminin göstərişini yerinə yetirəcək", -keçmiş müstəntiq bildirib.

Vəkillər Bəhruz Bayramov, Yalçın İmanov və Fariz Namazlı keçmiş müstəniqin günahının olmadığını, ittihamların istintaqda və məhkəmədə sübut olunmadığını, istintaqın və məhkəmələrin qanun pozuntuları ilə keçirildiyini bildirib. Vəkillər məhkəmədən cinayət işinə xitam verilməsi və R. Səfərova bəraət verilməsi barədə qərar qəbul etməsini xahiş ediblər.

"Rüfət Səfərov hüquq- mühafizə orqanlarında qanunsuzluqlar və korrupsiya halları ilə bağlı bəyanatla çıxış edərək istefa verdikdən sonra ona qarşı cinayət işi qaldırılıb. Onun rüşvət alması haqqında hər hansı fakt yoxdur, əməliyyat keçirilməyib. Yalnız bir neçə nəfərin ifadəsi ilə ona qarşı cinayət işi qaldırılıb. Şahidlərdən biri, ümumiyyətlə, məhkəməyə gəlməyib, digəri isə məhkəmədə verdiyi ifadəni günortadan sonra dəyişib. Halbuki, şahid ifadə vermişdi və onun təkrar ifadə verməsi barədə vəsatət qaldırılmamışdı. Sadəcə, şahidi yolda saxlayıb təzyiq etmişdilər, polis nəzarətində yenidən məhkəməyə gətirib təkrar ifadə verərək əvvəlki ifadəsindən imtina etmyə məcbur etmişdilər", -vəkil qeyd edib.

Vəkil Yalçın İmanov deyib ki, məhkəmə vəkilə və Rüfət Səfərova son çıxışa hazırlaşmaq üçün vaxt verməyib.

"Hüququn əsas prinsipi belədir: Bir şahid şahid deyil. İstənilən adam istənilən şəxsə şər ata bilər və istədiyini deyə bilər. Rüfət Səfərova qarşı deyilən rüşvəti sübut edən hər hansı fakt yoxdur və təsdiq edilməyib", - o bildirib.

Vəkilin və R.Səfərovun son söz deməsi üçün birinci instansiya məhkəməsi cəmi 15 dəqiqə vaxt verib.

"Şəxsin özünü müdafiəsi üçün hazırlaşmağa cəmi 15 dəqiqə vaxt verilirsə, bu, məhkəmənin sifarişi notarial qaydada təsdiqi kimi başa düşülməlidir", - Y.İmanov qeyd edib.

Vəkil Fariz Namazlı Ali Məhkəmənin R.Səfərov istefa verdikdən dərhal sonra ona qarşı cinayət işinin qaldırılmasının, şahidlərdən birinin məhkəməyə gəlməməsinin və digərinin ifadəsinin dəyişdirilməsinin, son söz üçün hazırlaşmağa vaxt verilməməsinin səbəblərinin araşdırılmasını xahiş edib. "Bütün bunlar Azərbaycan qanunvericiliyi və Avropa İnsan Hüquqları Konvensiyasının tələbləri ilə ziddiyyət təşkil edir", - o qeyd edib.

R.Səfərov öz çıxışında barəsində qaldırılan cinayət işinin saxta və sifariş olduğunu deyib.

"Bu səbəbdən də cinayət işi ləğv edilməli və mənə bəraət verilməlidir".

O bildirib ki, 2015-ci il dekabrın 20-də ölkədə mövcud olan rejimin korrupsiya və rüşvəti barədə bəyanatla çıxış etdikdən sonra siyasi və cinayət təqibinə məruz qalıb.

"Cinayət işi qaldırılmadan evimdə, iş otağımda axtarış aparıldı, kompüterim və mobil telefonum götürüldü. Azərbaycan hakimiyyətinə qarşı tənqidimi dayandırmadığım üçün məni həbs etdilər. Sonra 9 ay ev dustaqlığında qaldığım dövrdə istintaq hərəkəti aparılmadı. Azərbaycan hakimiyyətini tənqid etdim və keçmiş səhiyyə naziri Əli İnsanovun hüquqlarını müdafiə etdikdən sonra istintaq hərəkətlərini yenidən bərpa etdilər. Məhkəmədə son söz üçün vaxt vermədilər. Hətta Stalin repressiyası dövründə insanlara son söz imkanı verilib", - keçmiş müstəntiq bildirib.

O, sədrlik edən hakim Gülzar Rzayevin bilikli hüquqşünas olmasına baxmayaraq, müstəqil və ədalətli qərar qəbul edə bilməyəcəyini diqqətə çatdırıb.

"Amma müstəqil qərar vermək imkanınız yoxdur" , - o qeyd edib.

Dövlət ittihamçısı kassasiya şikayətinin təmin edilməməsini məhkəmədən xahiş edib və məhkəmə şikayəti təmin etməyib.

Vəkil Bəhruz Bayramov məhkəmənin qərarından Avropa İnsan Hüquqları Məhkəməsinə şikayət edəcəyini bildirib.

Məhkəmədən sonra R. Səfərovun atası Eldar Sabiroğlu məhkəmənin qərarını "insafsız qərar" adlandırıb. O, İlham Əliyev rejimini kəskin tənqid edib.

"Rüfət siyasi məhbusdur. Bu məhkəməni quran da, cəzanı verən də Azərbaycan prezidenti İlham Əliyevdir. Hakimlərin dəyişməsi, fikirlərin dəyişməsi üçün o, fikrini dəyişməlidir. Lakin onda bu amansızlıq, qəddarlıq hələ davam edir. Biz sona qədər mübarizə aparacağıq və haqq öz yerini tutacaq. Rüfət günahsızdır. Onu şərləyib həbs ediblər. Şər və böhtan çox yeriyən deyil. Mən bu hakimiyyətə 20 il xidmət etdim və gördüm çox səhv etmişəm. Bu da mənim bir günahımdır. Mən günahımı etiraf edirəm. Ədaləti bu gözəl, möhtəşəm binada axtardım, tapa bilmədim. Hakimlər də, prokurorlar da sifarişlə işləyir. Sifarişi yerinə yetirməsələr, həm puldan, həm də vəzifədən olacaqlar. Ona görə də mən bunun əsas günahkarı kimi Azərbaycan Respublikasının prezidenti İlham Əliyevi görürəm. Onun oğluma qarşı törətdiyi ədalətsiz və qanunsuz işləri lənətləyirəm", - E.Sabiroğlu qeyd edib.

R.Səfərovun hüquqlarını İctimai Müdafiə Komitəsinin rəhbəri Eldəniz Quliyev bildirib ki, məhkəmənin qərarı "Azərbaycan hakimiyyətinə utanc gətirən bir qərardır".

"Siseronun sözünü bir də diqqətə çatdırıram: Məhkəmənin sifarişlə işləməsi onun rüşvətlə işləməsindən pisdir", - o qeyd edib. -03C-