Alxanlı kənd sakinləri Zəhra Quliyevanın qatillərinin cəzalandırılmasını tələb edir

Bakı/07.07.17/Turan: Azərbaycanın Füzuli rayonunun Alxanlı kəndinin və ətraf yaşayış məntəqələrinin sakinləri ermənilərin açdığı atəş nəticəsində 50 yaşlı Sahibə Quliyevanın və onun iki yaşlı nəvəsi Zəhra Quliyevanın həlak olmasına və onların qohumu Sərvinaz Quliyeanın yaralanmasına qəzəbləniblər.

Alxanlı kəndi 1993-cü ilin avqustundan 1994-cü ilin yanvarına qədər qısa müddət ərzində erməni işğalı altında olub. Amma kənd azad edildikdən sonra da oraya qayıdan əhali atəş altında yaşayır.

Kənd yüksəklikdə yerləşir. Amma Ermənistan tərəfi ona işğal edilmiş Füzuli rayon mərkəzi tərəfindən daha əlverişli dağlıq mövqelərdən atəş açır.

Kənd Azərbaycan və Ermənistan qoşunlarının təmas xəttindən 2,5-3 k məsafədə yerləşir.

Yerli sakinlərin Turan-ın müxbirinə verdikləri məlumata görə, kənddə Azərbaycan ordusunun mövqeləri, obyektləri və texnikası yoxdur və iyulun 4-də Ermənistan tərəfi məqsədyönlü şəkildə kəndə atəş açıb.

İyulun 2-də də atəş açılıb, amma xoşbəxtlikdən xəsarət alan olmayıb. İyulun 4-də mərmi birbaşa Quliyevlərin həyətinə düşüb, nənə və nəvə burada həlak olub.

"Bizim hərbiçilərimiz hətta yeni zərbələr endirilməsin deyə ermənilərin açdıqları atəşə cavab da verməyib. Təqsirkarlar cəzalandırılmalıdır. Uşağın ölümünə görə qisas alınmalıdır. Biz uşaqlarımıza görə qorxuruq, onları küçəyə oynamağa buraxmağa qorxuruq", deyə yerli sakin Ruhiyə Feyziyeva bildirib.

İyulun 6-da hadisə yerində bir sıra xarici dövlətlərin hərbi attaşelərinə hadisənin təfsilatı barədə məlumat verilib. Alxanlı səfərində 10 səfirliyin hərbi nümayəndələri və diplomatlar iştirak ediblər.

Yerli sakinlər Qarabağ münaqişəsi üzrə beynəlxalq vasitəçilərin fəaliyyətsizliyindən narazılıqlarını bildiriblər.

"Nə qədər atəş altında yaşamaq olar? Axı buna son qoyulmalıdır.Artıq beynəlxalq təşkilatlara, danışıqlara inam yoxdur. Nə qədər ATƏT-in Minsk Qrupunun nümayəndələri, digər beynəlxalq təşkilatların əməkdaşları gələcək? Onlar münaqişəni həll etmək iqtidarında deyillərsə, qoy kənara çəkilsinlər və mane olmasınlar, biz özümüz öz torpaqlarımızı alarıq", deyə yerli sakin Elşad Quluzadə bildirib.

Atəş açılması ilə yanaşı, Ermənistan tərəfi kənddə təsərrüfat fəaliyyəti üçün maneələr yaradır. Belə ki, onlar nəzarətləri altında olan mənbədən gələn suyu kəsirlər və bu, suvarma üçün maneələr yaradır.

Bundan başqa, sıxlaşan atəşlərə görə insanlar məhsul toplaya bilmirlər, ermənilər isə qəsdən əkinləri yandırır.

Xarici dövlətlərin hərbi nümayəndələri KİV-ə şərh verməkdən yayınıblar, amma bəziləri yenə də qısa fikir bildiriblər.

"Bütün Amerika həlak olanların doğmalarının və yaxınlarının kədərini bölüşür", deyə ABŞ səfirliyinin hərbi attaşesi Ceyms Tomson bildirib.

Onun sözlərinə görə, ABŞ hesab edir ki, Qarabağ münaqişəsinin dinc yolla nizamlanması sülhün, mülki əhalinin təhlükəsizliyinin və sabitliyin təmin edilməsi üçün ideal yoldur.

Müdafiə Nazirliyinin mətbuat xidmətinin rəhbəri Vaqif Dərgahlı jurnalistlərlə söhbətində bildirib ki, bu yaşayış məntəqəsində Azərbaycan ordusunun nə hərbi texnikası, nə şəxsi heyəti, nə mövqeləri, nə də qərargahı yoxdur. "Kəndə gələn hərbi attaşelər və xarici KİV-lərin jurnalistləri bundan şəxsən əmin oldular", deyə Dərgahlı bildirib.

Alxanlı kəndi Bakıdan 320 km cənub-qərbdə, Azərbaycanın Füzuli rayonunun ərazisində, 1993-cü ildən erməni işğalı altında olan Füzuli şəhərinin rayon mərkəzindən 18 kim şərqdə yerləşir.

Alxanlıda 2 minə yaxın insan yaşayır, onlar əkinçilik və heyvandarlıqla məşğul olurlar. -06С03-