ANS-in MTRŞ-yə qarşı şikayəti inzibati məhkəməyə göndərilib

Bakı Apellyasiya Məhkəməsində Elşanə Vəliyevanın sədrliyi ilə çərşənbə günü ANS teleşirkətinin Milli Teleradio Şurasının telekanalın yayımının dayandırılması haqqında 18 iyul tarixli qərarından şikayətinə baxılıb.

ANS məhkəmədən bu qərarı qanunsuz hesab etməyi xahiş edib.

İclasda MTRŞ nümayəndəsi Toğrul Məmmədov bildirib ki, şikayətə Apellyasiya Məhkəməsi deyil, 1 saylı Bakı İnzibati-İqtisad Məhkəməsi baxmalıdır. Onun fikrincə, iddia Apellyasiya Məhkəməsində təhqiqat predmeti deyil.

Amma ANS-in nümayəndəsi Sevda Məhərrəmova bildirib ki, şirkətin MTRŞ-in bəzi televerilişlərin bağlanması haqqında qərarlarından şikayətlərinə Apellyasiya Məhkəməsində baxıldığı hallar var.

Bununla belə, hakim Vəliyeva işin 2 saylı Bakı İnzibati-İqtisad Məhkəməsinə göndərilməsi haqqında qərar qəbul edib.

ANS rəhbəri Vahid Mustafayev məhkəmədən ANS-in 25 illik fəaliyyətini, habelə əməkdaşların maddi problemlərini nəzərə almağı xahiş edib.

“Biz müstəqil Azərbaycanla eyni yaşdayıq”, deyə öz növbəsində ANS-in baş direktoru Mirşahin Ağayev bildirib. O etiraf edib ki, telekanal yardım üçün beynəlxalq ictimaiyyətə müraciət etməyib.

“Biz beynəlxalq təşkilatlardan heç nə xahiş etmirik və heç nə gözləmirik, amma onlar məsələ ilə maraqlanırlar. Biz imkan daxilində cavab veririk. Amma bu cavablar heç bir halda Azərbaycanın imicinə zərbə vurmur”, deyə Ağayev bildirib.

Xatırladaq ki, iyulun 18-də MTRŞ telekanalı terrorizmi və zorakılığı təbliğ etməkdə ittiham edərək, ANS-in yayımını dayandırıb. Bu, Türkiyədə dövlət çevrilişi zamanı baş verən hadisələrin işıqlandırılmasında və Ankaranın çevriliş cəhdinin təşkilatçısı elan etdiyi Fetullah Gülenlə müsahibə hazırlanmasında özünü göstərib.

İyunun 29-da Bakı Apellyasiya Məhkəməsi MTRŞ-nin ANS-in lisenziyasının ləğv edilməsi haqqında müraciətini təmin edib. -03D06-