![Apellyasiya Məhkəməsi Xədicə İsmayılovanın ölkədən çıxışına qadağanı qüvvədə saxlayıb](https://turan.az/resized/750/500/resize/media/2017/main/100900004883.jpg)
Apellyasiya Məhkəməsi Xədicə İsmayılovanın ölkədən çıxışına qadağanı qüvvədə saxlayıb
Bakı/09.10.17/Turan: Oktyabrın 9-da Bakı Apellyasiya Məhkəməsində araşdırmaçı-jurnalist Xədicə İsmayılovanın şikayətinə baxılıb.
Apellyasiya şikayəti jurnalistin ölkədən çıxışına qoyulmuş məhdudiyyətlə bağlı idi.
X.İsmayılova Binəqədi Rayon Məhkəməsinə müraciət edərək ölkədən çıxışına qadağanın qaldırılmasını istəyib.
Jurnalist iddiasını əsaslandırarkən göstərib ki, peşə fəaliyyəti ilə əlaqədar bir sıra beynəlxalq tədbirlərə dəvət olunsa da bu məhdudiyyət səbəbindən iştirak edə bilmir.
Binəqədi Rayon Məhkəməsi avqustun 10-da verdiyi qərarla jurnalistin iddiasını təmin etməyib. Apellyasiya şikayəti də həmin qərardan verilib.
Bakı Apellyasiya Məhkəməsində Namiq Məmmədovun sədrlik etdiyi hakimlər kollegiyası da şikayəti təmin etməyib - qərar qüvvədə saxlanılıb.
X.İsmayılovanın ölkədən çıxışının məhdudlaşdırılması ilə bağlı daha bir iddiasına isə oktyabrın 10-da yenə Binəqədi Rayon Məhkəməsində baxılacaq.
X.İsmayılova bu qadağanın qaldırılması tələbilə əvvəllər də məhkəməyə müraciət edib. Jurnalist bundan öncə iki dəfə məhkəməyə üz tutaraq beynəlxalq tədbirlərə qatılmasına imkan yaradılmasını tələb edib. Ancaq hər dəfəsində araşdırmaçı-jurnalistin müraciəti rədd olunub.
Jurnalistin ilk müraciəti üzrə iş artıq Avropa İnsan Hüquqları Məhkəməsinin icraatındadır.
X.İsmayılova 2014-cü il dekabrın 5-də həbs olunub. Jurnalist vergidən yayınma, qanunsuz sahibkarlıq kimi ittihamlarla 7 il 6 ay həbs cəzası alıb. O, ittihamları qəbul etmir, araşdırma yazılarına görə sifarişlə həbs olunduğunu bəyan edir.
Jurnalist 2016-cı il mayın 25-də Ali Məhkəmənin qərarı ilə həbsdən buraxılıb. Əvvəlki hökm 3 il 6 ay şərti cəza ilə əvəz edilib. Avqustda isə Cinayət Məcəlləsinə dəyişikliklərdən sonra şərti cəzanın müddəti 2 il 3 aya endirilib. Ancaq şərti cəza ilə əlaqədar jurnalistə Ali Məhkəmənin təyin etdiyi 5 il sınaq müddəti elə olduğu kimi saxlanılıb. X.İsmayılovanın ölkədən çıxışına məhdudiyyət də üzərindəki şərti cəza ilə əsaslandırılır.-0-
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz