ATİŞ talış dilinin inkişafı ilə bağlı tədbirlər təklif edib

Bakı/21.02.21/Turan:  Azərbaycan Talışların İctimai Şurasının  (ATIŞ) 21 fevral Beynəlxalq Ana dili günü ilə bağlı bəyanat yayıb.

Sənəddə deyilir: “ İlk növbədə etnik mənsubiyyətindən asılı olmayaraq, ölkəmizin bütün qardaş xalqlarının nümayəndələrini 21 fevral Beynəlxalq Ana dili günü münasibəti ilə səmimi qəlbdən təbrik edirik. Ümumi vətənimiz olan Azərbaycan Respublikasına sülh və əmin-amanlıq, hər bir Azərbaycan vətəndaşına yüksək rifah, səadət dolu xoşbəxt həyat arzu edirik.    Arxada qalan 2020-ci il ümumilikdə doğma vətənimiz Azərbaycanın taleyində uğurlu il oldu. Belə ki, keçən ilin payız aylarında müzəffər Azərbaycan ordusu uzun illərdən bəri erməni qəsbkarlarının tapdağı altında olan tarixi torpaqlarımızı işğaldan azad etdi. Talışlar da digər qardaş xalqların nümayəndələri kimi, İkinci Qarabağ müharibəsində ölkəmizin düşmən üzərində qazandığı parlaq qələbəsi naminə misilsiz rəşadət göstərdilər. İşğal olunmuş ərazilərimizin düşməndən azad olunması naminə xeyli sayda şəhidlər verdilər, yaralananlar oldu. Talışlar ölkəmizin ərazi bütövlüyünün təmin olunmasında və qorunmasında hər zaman avanqard olmuş və olacaqlar».

Bununla belə  ATİŞ  təəssüflə qeyd edir ku, “talışların xoşbəxt, qürürlu və ləyaqətli Azərbaycan vətəndaşı olmağına mane olan, ortada xeyli ciddi problemlər həllini gözləməkdədir”. Bir il əvvəl, 21 fevral 2020-ci il tarixdə, Beynəlxalq Ana dili günü münasibəti ilə keçirilən tədbirdə Azərbaycan Talışların İctimai Şurası  “Azərbaycan Respublikasında talış dilinin hazırkı vəziyyəti və bu istiqamətdə təxirəsalınmaz tədbirlər haqqında” Mövqe sənədi qəbul etdi  və bunu ali dövlət orqanlarına  Ombusmana göndərdi. Üstündən bir il vaxt keçməsinə baxmayaraq, adı çəkilən ali dövlət strukturlarının heç biri müraciətlərə hətta cavab belə vermədilər.

“Keçən əsrin 30-cu illərindən etibarən, Stalin rejimi tərəfindən repressiyaya məruz qalmış Talış xalqının adının, dilinin və mədəniyyətinin reablitasiyası, yaşaması və hifz olunması naminə bizə dövlət qayğısı göstərilmir, bu istiqamətdə resurs və təsisatların ayrılmasına xəsislik edilir. Bu barədə konkret təkliflər paketi ilə, kollektiv şəkildə dövlətimizin ali idarəetmə orqanlarına dəfələrlə müraciətlər etmişik. Lakin bu müraciətlərimizə heç bir reaksiya verilməmiş, onlar cavabsız qalmışlar”, - daha sonra bəyanatda vurğulanır. 

“Dilindən və dilindən asılı olmayaraq, hər bir Azərbaycan Respublikası vətəndaşının təhlükəsiz, ləyaqətli, qürurlu, xoşbəxt yaşamlarına zamin duran, başda Azərbaycan Respublikasının Prezidenti cənab İlham Əliyev olmaqla, Azərbaycan hakimiyyətinin cavabdeh yüksək səlahiyyətli nümayəndələrindən etnik kimliyimizin qorunub saxlanmasına dəstək olaraq, Dövlət resurs və təsisatları çərçivəsində aşağıdakı institutların dərhal fəaliyyətə başlamasına yardımçı olmalarını xahiş və tələb edirik”, - daha sonra vurğulayaraq bəyanat müəllifləri aşağıdakı təklifləriirəli sürür: 

Regionun orta ümümtəhsil məktəblərində talış dilinin tədrisi;

Talış dilində dərs vəsaitlərinin nəşri;

Dövlət kollec, texnikum və universitetlərində talış dili və filologiyası ixtisası üzrə müəllim kadrlarını hazırlayan fakültə və kafedraların açılması;

Regionun mərkəzi olan Lənkəran şəhərində talış dlində radio və televiziyanın fəaliyyətə başlaması;

-Lənkəran şəhərində talış dilində Dövlət teatrı, konservatoriya və filarmoniyanın açılması;

 -Talış dilində dərc olunan qəzet və jurnallara Dövlət qayğısı;

 -Azərbaycan Respublikası Nazirlər Kabineti yanında Adlar və Terminalogiya komissiyasının “Talış adının arzuolunmaz adlar siyahısına salınsın!” diskriminasiya xarakterli qərarının ləğv edilməsi;  

 -Talış adı ilə yaranan ictimai birliklərinin Dövlət Qeydiyyatına alınması.-0-