Media-icmal 22.02.21

“Mətbuat.az” saytı “Revanşist qüvvələrin fəallığının artmasına hazır olmalıyıq - Qafqazşünas alimdən açıqlama” sərlövhəli məqalədə bəzi qüvvələrin Qarabağda əvəzçıxma cəhdində olmaq istədiklərini diqqətə çatdırır.

AMEA Qafqazşünaslıq İnstitutunun Qafqaz siyasəti şöbəsinin müdiri, tarix üzrə fəlsəfə doktoru Elnur Kəlbizadə bildirir ki, 44 günlük Vətən Müharibəsində Azərbaycanın qələbəsi Ermənistanda şok effekti yaradıb və bu, hələ bir müddət davam edəcək.

Müəllif  həm də xəbərdarlıq edir ki, bu müddətdə revanşist qüvvələrin fəallığının artması gözləniləndir və buna hazır olmaq lazımdır, amma müəllif bunu da əlavə edir ki, bu çağırışları edənlərin özləri də Azərbaycan və Ermənistanın gücü arasındakı fərqləri yaxşı bilirlər.

Müəllif hesab edir ki, əslində Ermənistanı indiki səfil vəziyyətə işğal və terror salıb, revanşist çağırışlar, psevdo-milliyyətçi şüarlar hakimiyyəti ələ keçirmək üçündür, bu qüvvələrin fəallığı mart-aprel ayları ərzində də davam edəcək.

“Sfera.az” saytı “Ölkədə koronaya yoluxma sayında artım gözlənilir” sərlövhəli məqalədə Azərbaycanda koronavirus infeksiyası ilə bağlı durumu Azərbaycan Həkimləri İctimai Birliyinin sədr müavini, tanınmış həkim-radioloq Aydın Əliyevlə dəyərləndirir.

A.Əliyev hesab edir ki, bir tərəfdən karantin rejiminin yumşaldılması ilə bağlı qərarlar, digər tərəfdənsə, metronun bağlı olması bu ehtimalı çoxaldır: “Karantin qaydalarında müəyyən qədər yumşaldılmalara gedilib. Orta və ali məktəblərdə ənənəvi tədrisin qismən bərpası, ictimai nəqliyyatda müşahidə edilən sıxlıq və s. halları nəzərə alsaq, ölkədə koronavirusa yoluxma sayında artım ehtimalı qalır”, - A.Əliyev  bildirir.

A.Əliyevə görə, karantinin sərtləşməsi isə o zaman ola bilər ki, yoluxma sayı kəskin artsın, bununla bağlı proses ən azı 2 həftə izlənəcək, artım olsa, növbəti yumşalmalar yəqin ki, təxirə salınacaq.

Onun fikrincə, növbəti qarar metronun açılması ilə bağlı verilməlidir, çünki avtobuslarda həddindən çox sıxlıq var və metro qapalı məkan olsa da ventilyasiya sistemi mövcuddur. Buna görə də metronun açılması və sərnişin sıxlığının azaldılması üçün vacibdir.

“Müsavat.com”  saytı  “Rusiya Qarabağda separatçıları niyə himayə edir? - Çünki Rusiya göstərməlidir ki...” sərlövhəli məqalədə Qarabağda Rusiya sülhməramlılarının sərlövhəli məqalədə Qarabağda Rusiya sülhməramlılarının fəaliyyətindən bəhs edilir.

Müəllif deyir ki, Rusiya sülhməramlıları Qarabağda separatçı hərəkatın ildönümünün qeyd olunmasına şərait yaradıb və bu məsələ çoxsaylı suallar yaradır.

Müəlifə görə, Rusiya bununla göstərmək istəyir ki, problem hələ davam edir və sülhmrəmalı qüvvələr ona görə Qarabağda olmalıdır.

Səbəbi isə müəllif belə izah edir: “Azərbaycanın problem hesab etdiyi bütün məsələlər həllini tapacaqsa, Azərbaycanın suverenliyi bütün Qarabağ ərazisində bərqərar olacaqsa, bu, o deməkdir ki, sülhməramlı əməliyyatı zəruri edən səbəblər aradan qalxır və bu missiya başa çatmalıdır”.

Müəllif yada salır ki, Rusiya,  eləcə də Qərb erməni separatizmini legitim sayır, RF prezidenti Putin isə hadisələrin Sumqayıtdakı erməni qırğınları (1988-ci ilin 28 fevral, 1 mart hadisələri nəzərdə tutulur-red.) ilə başladığını deyir.

Müəllif hesab edir ki, “bu xəmir hələ çox su aparacaq”, regionda kommunikasiyaların Rusiyanın moderasiyası altında açılması Kremlin uzunmüddətli planlarından xəbər verir.

“Yenisabah.az” saytı “Nə vaxta qədər bir “durbanın“ ümidinə qalacağıq?“ sərlövhəli məqalədə  ölkədə ixracatın vəziyyətini tanınmış iqtisadçı-ekspert Natiq Cəfərli ilə dəyərləndirir.

Ekspert rəsmi statistikaya istinadən deyir ki, 2021-ci ilin yanvar ayında Azərbaycandan 833 çeşiddə mal ixrac olunub. Bu, illik müqayisədə 22,4% azdır.

Onun deməsinə görə, ixrac məhsullarının çeşidi çox ciddi azalıb və bunun pandemiya ilə əlaqəsi yoxdur. Çünki sərhədlərin bağlı olması idxal-ixraca çox az təsir edir, belə ki, yanvar ayında ölkəyə 4752 çeşiddə məhsul idxal edilib ki, bu da keçən ilə nisbətən cəmi 2,7% azdır, azalma səbəbi əhalinin alıcılıq qabiliyyətinin aşağı düşməsidir.

Ekspert deyir ki, tək çeşid deyil, həcm də azalır, 2020-ci ildə qeyri-neft sektoru üzrə ixrac 2019-cu illə müqayisədə 102 milyon ABŞ dolları və ya 5,2% azalıb: “Bəs ixrac niyə azalır? Bəs hanı bu sahənin inkişafı? Bəs nə oldu qeyri-neft sektoru? Nə vaxta qədər bir “durbanın” ümidinə qalacağıq?!” deyə ekspert suallar ünvanlayır.

O əlavə edir ki, indi OPEC- ə neft müvəqqəti 63-65 dollar olub, sabah neft nəhəngləri bazara girib hasilatı bərpa edəndə nə olacaq?!

Ekspert vurğulayır ki, qeyri-neft sektoru yeni simalar, amma köhnə qaydalarla inkişaf edə bilməz, çünki əsas şəxslər deyil, sistemdir.