Avropa İttifaqı, BMT-nin İnkişaf Proqramı Azərbaycanda peşə təhsilinin inkişafına dəstək verir

Bakı/24.05.18/Turan: Avropa İttifaqı və Birləşmiş Millətlər Təşkilatının İnkişaf Proqramı, ümumi dəyəri 3,4 milyon ABŞ dolları olan peşə təhsili və insan kapitalını gücləndirmək məqsədi ilə yeni layihə həyata keçirir. Bu barədə hər iki qurumun mətbuat üçün məlumatında deyilir.

Əsasən Azərbaycanın iki bölgəsi - Gəncə və Cəlilabadda texniki peşə təhsil və ixtisaslaşdırılmış peşə biliyi bazasının artırılmasını nəzərdə tutan "Azərbaycanda peşə təhsili və təlimi mərkəzlərinin müasirləşdirilməsi" adlı layihə 2020-ci ilədək davam edəcək.

"Layihə ölkənin işçi potensialının ən həssas kateqoriyaları, o cümlədən gənclər, qadınlar və əlilliyi olan şəxslərin əmək bazarının tələblərinə cavab verən bacarıq və resurslardan yararlanmalasını təmin edəcək. Bu məqsədlə BMTİP qeyri-neft sektorunda yeni peşə təhsili proqramlarının işlənib hazırlanması və həyata keçirilməsində milli qurumlara dəstək verəcək", deyə məlumatda qeyd edilir.

Layihənin Gəncə regional komponentinə mayın 24-də start verilərək beynəlxalq ictimaiyyət, yerli hakimiyyət orqanları, özəl sektor və yerli texniki peşə məktəblərinin müəllim heyətindən ibarət 60 nümayəndəni bir araya gətirən açılış mərasimi təşkil edilib.

Layihənin bu komponenti Gəncədə Sənaye üzrə Regional Peşə Kompetensiya Mərkəzinin yaradılmasına dəstək göstərəcək.

Açılış mərasimində çıxış edən Avropa İttifaqının Azərbaycan üzrə nümayəndəliyinin rəhbəri Kestutis Yankauskas peşə təhsili sektorunun müasir, şaxələnmiş iqtisadiyyat üçün ilkin şərt olduğunu qeyd edib.

"Azərbaycan kimi əhalisinin 40%-i 25 yaşdan aşağı olan bir ölkədə təhsil, o cümlədən peşə təhsili və təlimi uzunmüddətli iqtisadi dayanıqlığa yatırılan əsas sərmayədir", deyə o qeyd edib. -03B-