Avropa Şurası jurnalistlərlə bağlı riskləri və təhlükələri araşdırır

  Avropa Şurası “Jurnalistlər üçün risklər” mövzusunda araşdırmaya başlayıb. Bu, bir sıra beynəlxalq jurnalist təşkilatları ilə birgə keçirilir. Məqsəd AŞ ölkələrində media nümayəndələrinin üzləşdikləri təhlükə və çağırışların öyrənilməsidir.

“Jurnalist işi çox zaman riskli və təhlükəlidir. Jurnalistlər iş vaxtı əsassız maneələrlə qarşılaşırlar ki, bu da yüksək səviyyədə qorxu yarada bilər. Hücumlar və psixoloji təzyiq özünüsenzuraya gətirib çıxarır”, - AŞ-nin məlumatında deyilir.

Bununla əlaqədar AŞ İnformasiya Departamenti Avropada jurnalistlərin işinə əsassız müdaxilə ilə bağlı hərtərəfli araşdırmaya başlayıb.

Araşdırmalar çərçivəsində AŞ üzvü olan 47 ölkədə ən azı 1000 jurnalist arasında anonim sorğunun keçirilməsi nəzərdə tutulur.

Respondentlər jurnalistlərə hücum və onların fiziki toxunulmazlığının pozulması, təqib edilməsi, media nümayəndələrinə qarşı cinayətlərə görə cəzasızlıq, mənbələrin qorunmasının etibarlılığı kimi suallara cavab verəcəklər. 

Nəticələr təhlil edilərək Malta Universitetinin professoru Merilin Klarkın rəhbərliyi ilə Avropa Jurnalistlər Federasiyası, “Senzura İndeksi”, Jurnalistlərin Təhlükəsizliyi İnstitutu və “Sərhədsiz reportyorlar” təşkilatı ilə əməkdaşlıq şəraitində ümumiləşdiriləcək.

Sorğuda iştirak etmək istəyənlər türk, ingilis, fransız, rus və serb dillərində anketləri doldura bilər:

https://ru.surveymonkey.com/r/Journalist_Russian,

https://tr.surveymonkey.com/r/Journalist_Turkish,

https://www.surveymonkey.com/r/Journalist_English,

https://fr.surveymonkey.com/r/Journalist_French,

https://www.surveymonkey.com/r/Journalist_Serbian .--06D--