AXCP fəalı həbsxanada işgəncələrə məruz qalmasından şikayətlənir

Bakı/23.09.20/ Turan: Xalq Cəbhəsi Partiyasının üzvü, həbsdə olan Aqil Məhərrəmli Penitensiar xidmətin 3 saylı tibb müəssisəsində qeyri-insani rəftara məruz qalıb. Bu barədə o, yaxınlarına məktubunda məlumat verib.

AXCP-dən bildiriblər, A.Məhərrəmli hazırda 2 saylı koloniyadadır. Qeyri-insani rəftar faktı iyul ayında “koronavirus” diaqnozu ilə 2 saylı koloniyadan tibb müəssisəsinə köçürüldüyü zaman baş verib.

“3 saylı vərəm ələyhinə müəssisədə tam 41 gün qaldım. Biz hamımızı toplayıb aspirin və parasetamol ilə müalicə edirdilər. Sonra bir neçə gün təkadamlıq kameraya yerləşdirdilər. Şəxsən məni orada 10 gün saxladılar.

Döşəyi ancaq gecə verirdilər. Bütün günü taxtanın üstündə yatırdım. Sabun vermirdilər, bunu buranın karser olması ilə əsaslandırırdılar.

Bəzilərimizi döyürdülər və qandalla çarpayılara bağlayırdılar. Tualetə getməyə icazə vermirdilər”, - A.Məhərrəmov yazıb.

Penitensiar Xidmətdən Turan-ın qeyd olunan faktları şərh etmək xahişinə cavab olaraq bildiriblər ki, məktubda deyilənlər həqiqətəuyğun deyil.

“Adamlar 3 saylı ixtisaslaşdırılmış tibb müəssisəsində müalicə olunurlar. Heç bir işgəncə və ya amansız rəftardan söhbət gedə bilməz”, - Penitensiar Xidmətin əməkdaşı bildirib.

Aqil Məhərrəmli 2018-ci ilin mayında saxlanılıb və “AXCP-nin qanunsuz maliyyələşdirilməsi haqqında” iş üzrə 4 il müddətinə azadlıqdan məhrum edilib.—06В-