Azərbaycanda 130 siyasi məhbus var - hüquq müdafiəçiləri

Bakı/01.09.18/Turan: Siyasi məhbuslar siyahısının hazırlanması üzrə işçi qrup sentyabrın 1-də Azərbaycanda siyasi məhbusların növbəti yenilənmiş siyahısını təqdim edib. Siyahıya 130 nəfərin adı daxil edilib. Bu barədə işçi qrupun press-relizində deyilir.

Qrup qeyd edir ki, işçi qrupun əlində olan sənədlər, məhkəmə proseslərinin müşahidəsi 128 nəfəri siyasi məhbus hesab etməyə imkan verir.

Onlardan 9 nəfəri jurnalist və bloger, 1 nəfəri hüquq müdafiəçisi, 17 nəfəri siyasi və ictimai fəallar, 68 nəfəri dindarlar, 1 nəfəri şair, 3 nəfəri ömürlük həbsə məhkum edilənlər, 14 nəfəri sosial etirazlarda iştiraka görə həbs edilənlər, 2 nəfəri keçmiş dövlət məmurları, 2 nəfəri "siyasi girovlar" (siyasətçilərin qohumları), 10 nəfəri Səid Dadaşbəylinin qrupundan olan dindarlardır (hələ 2007-ci ildə həbs ediliblər).

İki nəfərin işi monitorinq altındadır.

İşçi qrupun martın 22-də elan edilmiş əvvəlki siyahısından 22 nəfər azadlığa çıxıb. Onlardan 9 nəfəri əvf olunub, 11 nəfəri cəza müddəti başa çatdığı üçün azad edilib. İki nəfər şərti azadlığa buraxılıb.

Eyni zamanda, 8 nəfər (Əbülfəz Bünyatov, Orxan Baxışlı, Mirfeyzulla Seyidov, Saleh Rüstəmov, Vidadi Rüstəmli, Aqil Məhərrəmov, Babək Həsənov, Ruslan Nəsirli) siyasi məhbus hesab edilib və adları siyahıya daxil edilib.

İşçi qrup hesab edir ki, əslində siyasi məhbusların sayı bu siyahıdakından xeyli çoxdur.

"Repressiv mühit çoxlarını onların işinin açıqlanmasından yayınmağa məcbur edir.

Digər tərəfdən, hüquqi məlumatsızlıq, vəkillərə qarşı repressiv siyasət, onların kəskin çatışmazlığı, regionlarda hüquqi müdafiə mexanizmlərinin olmaması bu şəxslərin siyasi məhbus kimi tanınması üçün məlumat və sənəd toplanması prosesini çətinləşdirir", deyə bəyanatda qeyd edilir.

İşçi qrup qeyd edir ki, 2017-ci ilin sonundan etibarən bu qurumla əməkdaşlıq edən vəkillərə qarşı intensiv təzyiq başlayıb.

Vəkil Yalçın İmanovun səlahiyyətlərinə tamamilə xitam verilib, Fəxrəddin Mehdiyev, Əsabəli Mustafayev, Nemət Kərimli 1 illik vəkillikdən kənarlaşdırılıb.

Press-relizdə həmçinin AŞPA-nın İslandiyalı deputat Thorhild Sunna Evarsdottirin Azərbaycanda siyasi məhbuslar üzrə yeni məruzəçi təyin etdiyi qeyd edilir, o, müvafiq hesabat hazırlamalıdır.

Azərbaycan hakimiyyəti ölkədə siyasi məhbus olduğunu təkzib edir.

İşçi qrupa Azərbaycanın aparıcı hüquq müdafiəçiləri, vətəndaş fəalları və hüquqşünas-ekspertlər daxildir. Qrupun əlaqələndiriciləri hüquq müdafiəçiləri İntiqam Əliyev və Rəsul Cəfərovdur. -06D-